एजेन्सी । कृत्रिम बौद्धिकता कम्पनी एन्थ्रोपिक विश्वकै ठूलोमध्येको एक प्रारम्भिक सार्वजनिक निष्कासन (आईपीओ) ल्याउने तयारीमा जुटेको छ । कम्पनीको सम्भावित मूल्यांकनका लागि लगानीकर्ता र बैंकरहरूले हालको आम्दानीभन्दा आगामी दुई वर्षको वित्तीय प्रक्षेपणलाई आधार बनाउन थालेका छन् ।
रोयटर्सका अनुसार एन्थ्रोपिकले सन् २०२८ मा करिब १९० अर्बदेखि २०० अर्ब अमेरिकी डलरसम्म आम्दानी गर्ने प्रक्षेपण गरेको छ । यो कम्पनीले मे महिनामा सार्वजनिक गरेको ४७ अर्ब डलरको आम्दानी प्रक्षेपणभन्दा निकै माथि हो ।
कम्पनीको वित्तीय अवस्थासँग परिचित दुई व्यक्तिका अनुसार, लगानीकर्ता र बैंकरहरूले एन्थ्रोपिकको सम्भावित मूल्यांकनका लागि तीव्र गतिमा बढिरहेका प्रविधि कम्पनीमा प्रयोग हुने आम्दानी गुणकलाई आधार बनाइरहेका छन् । यद्यपि आईपीओको मूल्यांकनमा दुई वर्षपछिको आम्दानीलाई आधार बनाउनु असामान्य मानिन्छ ।
एन्थ्रोपिकको तीव्र विस्तार र कृत्रिम बौद्धिकताको पूर्वाधारमा भइरहेको ठूलो लगानीका कारण कम्पनीको मूल्यांकनका लागि उपयुक्त तुलनात्मक आधार तय गर्न चुनौती देखिएको छ । कम्प्युटिङ क्षमता, मोडल तालिम र कर्मचारी विस्तारमा कम्पनीले ठूलो रकम खर्च गरिरहेको छ, जसले तत्कालको नाफामा दबाब सिर्जना गरिरहेको छ ।
यसका बाबजुद लगानीकर्ताले कम्पनीको आम्दानी बढ्दै जाँदा लागतको अनुपात घट्ने र नाफाको अन्तर सुधार हुने अपेक्षा गरेका छन् । एन्थ्रोपिकको आम्दानी दरमा पछिल्लो समय तीव्र वृद्धि देखिएको छ । रोयटर्सका अनुसार सन् २०२५ को अन्त्यमा करिब ९ अर्ब डलर रहेको आम्दानी दर मे महिनासम्म ४७ अर्ब डलरभन्दा माथि पुगेको थियो ।
सन् २०२६ को दोस्रो त्रैमासिकमा एन्थ्रोपिकले कम्तीमा १०.९ अर्ब डलर आम्दानी गर्ने प्रक्षेपण गरेको छ । यो अघिल्लो त्रैमासिकको तुलनामा दोब्बरभन्दा बढी हो । कम्पनी पहिलोपटक करिब ५६ करोड डलरको त्रैमासिक सञ्चालन नाफा हासिल गर्ने दिशामा पनि अघि बढिरहेको बताइएको छ ।
एन्थ्रोपिकको मूल्यांकनका लागि लगानीकर्ताहरूले क्लाउडफ्लेयर, पालन्टियर र स्पेसएक्सजस्ता उच्च वृद्धि भएका कम्पनीलाई तुलनात्मक आधारका रूपमा हेरिरहेका छन् । एलएसईजीको तथ्यांकअनुसार पालन्टियरको मूल्यांकन यस वर्षको अपेक्षित आम्दानीको करिब ५३ गुणामा छ भने स्पेसएक्स र क्लाउडफ्लेयर क्रमशः २०२६ को अपेक्षित आम्दानीको ४१.६ गुणामा कारोबार भइरहेका छन् ।
यी कम्पनीले एन्थ्रोपिकको सम्भावित मूल्यांकनका फरक आधार प्रस्तुत गर्छन् । पालन्टियरलाई कृत्रिम बौद्धिकतामा आधारित तीव्र विस्तार भइरहेका व्यवसायका लागि सन्दर्भका रूपमा हेरिन्छ भने क्लाउडफ्लेयरले उच्च वृद्धि भएका सफ्टवेयर तथा पूर्वाधार कम्पनीसँग तुलना गर्ने आधार दिन्छ । स्पेसएक्सले भने वर्तमान आम्दानीभन्दा भविष्यको विस्तारको सम्भावनालाई कम्पनीको मूल्यांकनमा कसरी समेट्न सकिन्छ भन्ने उदाहरण प्रस्तुत गर्छ ।
एन्थ्रोपिकले अहिलेको आम्दानीभन्दा धेरै ठूलो भविष्यको बजारलाई लक्षित गरिरहेको छ । कम्पनीले जीपीयू, कम्प्युटिङ क्षमता, मोडल तालिम, इन्फरेन्स र कर्मचारी विस्तारमा गरिरहेको ठूलो लगानीले तत्कालको नाफा सीमित गरे पनि दीर्घकालमा आम्दानी र नाफा बढाउने आधार तयार गरिरहेको लगानीकर्ताको अपेक्षा छ ।
यही तीव्र वृद्धिका कारण एन्थ्रोपिकले आईपीओको सम्भावित मूल्यांकनका लागि सन् २०२८ को वित्तीय प्रक्षेपणलाई केन्द्रमा राखेको देखिन्छ । कम्पनीको आगामी विस्तार, कृत्रिम बौद्धिकताको बढ्दो माग र लागत व्यवस्थापनको क्षमताले यसको वास्तविक मूल्यांकन निर्धारण गर्नेछ ।
