बागमती । लामो समयदेखि उठ्न नसकेको सरकारी बक्यौता असुली गर्न हेटौँडा औद्योगिक क्षेत्र व्यवस्थापन लिमिटेडले विद्युत् लाइन काट्ने अभियान थालेपछि १० करोड रुपैयाँ बक्यौता उठेको छ ।
हेटौँडा औद्योगिक क्षेत्रमा सरकारी जग्गा, भवन तथा पूर्वाधार प्रयोग गर्दै लामो समयदेखि भाडा र विभिन्न महसुल नतिर्ने उद्योगको सङ्ख्या ६० भन्दा बढी छ । औद्योगिक क्षेत्रमा कूल १४७ वटा उद्योग सञ्चालनमा रहेका छन् ।
कार्यालयले बक्यौता नतिर्ने ६० भन्दा बढी उद्योगको विद्युत् लाइन काटेपछि बक्यौता रकम असुलीमा उल्लेख्य प्रगति भएको हो । अदालतको आदेशअनुसार औद्योगिक क्षेत्रले ११ करोड रुपैयाँ बक्यौता उठाउनुपर्नेमा हालसम्म १० करोड रुपैयाँ असुल भएको सूचना अधिकारी हिमालय भण्डारीले जानकारी दिए ।
बाँकी बक्यौता पनि असुल गर्न आवश्यक प्रक्रिया अघि बढाइएको कार्यालयले जनाएको छ ।
