काठमाडौं । म्याजिक ब्रान्डका चप्पलको निर्यात बढेसँगै जयश्री पोलिमरको व्यापारले गति लिएको छ । कम्पनीले गत आर्थिक वर्षको १० महिनामै १ अर्ब ८ करोड ३० लाख रुपैयाँको व्यापार गरेको छ । यो रकम कम्पनीले सन् २०२५ को पूरा अवधिमा गरेको १ अर्ब ९ करोड ७० लाख रुपैयाँको कारोबारको करिब बराबर हो ।
कम्पनीले सन् २०२४ मा ८६ करोड ४० लाख रुपैयाँको व्यापार गरेको थियो । त्यसको तुलनामा सन् २०२५ मा कारोबार २७ प्रतिशतले बढेको थियो । भारततर्फको निर्यात बढेपछि कम्पनीको व्यापारमा उल्लेख्य सुधार आएको हो । सन् २०२५ मा कम्पनीको कुल आम्दानीमध्ये ६२.०४ प्रतिशत निर्यातबाट भएको थियो ।
व्यापारसँगै कम्पनीको सञ्चालन क्षमता पनि सुधारिएको देखिन्छ । सन् २०२५ मा १३.६५ प्रतिशत रहेको सञ्चालन मार्जिन गत आर्थिक वर्षको १० महिनामा बढेर १६.४७ प्रतिशत पुगेको छ । यसले बिक्री बढ्नुका साथै सञ्चालनबाट हुने आम्दानीमा समेत सुधार आएको देखाउँछ ।
कम्पनीको नगद सञ्चिति पनि बढेको छ । सन् २०२५ मा १२ करोड १० लाख रुपैयाँ रहेको नगद सञ्चिति गत आर्थिक वर्षको १० महिनामा बढेर १४ करोड रुपैयाँ पुगेको छ ।
सन् २००३ मा स्थापना भएको जयश्री पोलिमरले विभिन्न प्रकारका चप्पल उत्पादन गर्दै आएको छ । कम्पनी नेपालमा इथिलिन–भिनल एसिटेट प्रविधिमा आधारित उत्पादन कारखाना स्थापना गर्ने पहिलो कम्पनीमध्ये एक हो । कम्पनीसँग वार्षिक ९० लाख जोडी चप्पल उत्पादन गर्ने क्षमता छ ।
कम्पनीले म्याजिक, म्याजिक प्लस र एक्टिभा ब्रान्डमा चप्पल उत्पादन तथा बिक्री गर्दै आएको छ । भारतसहितका बजारमा निर्यात विस्तारलाई कम्पनीले कारोबार वृद्धिको मुख्य आधार बनाउँदै आएको छ ।
कम्पनीको वित्तीय संरचना पनि तुलनात्मक रूपमा सहज देखिन्छ । कम्पनीको समग्र गियरिङ अनुपात ०.९५ गुणा छ । सन् २०२५ मा ०.३३ गुणा रहेको ऋण–इक्विटी अनुपात गत आर्थिक वर्षको १० महिनामा ०.९६ गुणा पुगेको छ ।
कम्पनीको ब्याज तिर्ने क्षमता भने बलियो छ । सन् २०२५ मा ७.५६ गुणा रहेको ब्याज कभरेज अनुपात गत आर्थिक वर्षको १० महिनामा सुधार भएर ८.०६ गुणा पुगेको छ । कम्पनीको कुल ऋण तथा नगद सञ्चितिको अनुपात ३.१९ गुणा रहेको छ ।
जयश्री पोलिमरमा अनुज पोदार र रुबी अग्रवालको बराबर स्वामित्व रहेको छ । कम्पनीले दीर्घकालीन तथा अल्पकालीन कर्जाका लागि कुल ५० करोड रुपैयाँको रेटिङ गराएको छ । त्यसमध्ये १३ करोड ८६ लाख रुपैयाँ दीर्घकालीन र ३६ करोड १४ लाख रुपैयाँ अल्पकालीन कर्जाका लागि रहेको छ ।
