काठमाडौँ – सरकारले गोरखामा निर्माणाधीन तथा अध्ययनको चरणमा रहेका जलविद्युत् आयोजना र विद्युत् पूर्वाधारका कामलाई प्रभावकारी रूपमा अघि बढाउन आवश्यक समन्वय र सहजीकरण गर्ने भएको छ।
गोरखामा जलविद्युत् आयोजना विकासका क्रममा देखिएका समस्या र विद्युत् पूर्वाधारसम्बन्धी विषयमा गृहमन्त्री तथा सरोकारवालासँग छलफल भएको ऊर्जा, जलस्रोत तथा सिँचाइ मन्त्रालयले जनाएको छ।
मन्त्रालयका अनुसार आयोजना विकासका क्रममा देखिएका समस्या पहिचान गरी समाधानका लागि आवश्यक समन्वय, सहजीकरण र पहल गरिनेछ।
सरकारले गोरखाको जलविद्युत् सम्भावनालाई व्यवहारमा रूपान्तरण गर्दै स्थानीय विकास, रोजगारी सिर्जना र समग्र आर्थिक समृद्धिमा योगदान पुग्ने गरी आयोजना अघि बढाउने जनाएको छ। जलविद्युत् आयोजना विस्तारसँगै विद्युत् उत्पादन तथा प्रसारण पूर्वाधार विकासलाई समेत प्राथमिकतामा राखिने मन्त्रालयको भनाइ छ।
