काठमाडौं- कुमारी बैंक लिमिटेड र हेलभेटास स्विस इन्टरकोअपरेसन नेपाल (हेलभेटास नेपाल) बीच हरित अर्थतन्त्रमा संलग्न लघु उद्यमी, कृषक तथा युवाद्वारा सञ्चालित व्यवसायलाई वित्तीय पहुँच र व्यावसायिक सहयोग उपलब्ध गराउनेसम्बन्धी सम्झौता भएको छ।
सम्झौतापत्रमा कुमारी बैंकका प्रमुख मार्केटिङ तथा लगानी अधिकृत चन्दन कार्की र हेलभेटास नेपालका कन्ट्री डाइरेक्टर मनिष प्रधानले हस्ताक्षर गरेका छन्।
सम्झौताअनुसार हेलभेटास नेपालको प्राविधिक तथा व्यावसायिक अनुभव र कुमारी बैंकको वित्तीय सञ्जाललाई एकीकृत गरी समावेशी आर्थिक विकास, उद्यम प्रवर्द्धन र मूल्य शृङ्खला सुदृढीकरणमा सहकार्य गरिनेछ।
कुमारी बैंकका दिगो बैंकिङ प्रमुख अर्पण पौडेलले हरित उद्यम विकासका लागि बैंकले वित्तीय स्रोतसँगै आवश्यक व्यावसायिक क्षमता अभिवृद्धिमा समेत सहयोग गर्ने बताए।
सहकार्यले दिगो रोजगारी सिर्जना, नवप्रवर्तन तथा जलवायु–उत्थानशील अर्थतन्त्र निर्माणमा योगदान पुग्ने अपेक्षा गरिएको बैंकले जनाएको छ।
हाल कुमारी बैंकले देशभर २७९ शाखा, २६९ एटिएम, ४१ एक्सटेन्सन काउन्टर, ४० शाखारहित बैंकिङ एकाइ र १,२३३ भन्दा बढी पीओएस टर्मिनलमार्फत सेवा दिँदै आएको छ।
