काठमाडौं । एमएडब्लू वृद्धि नेपालले चिनियाँ अटोमोबाइल निर्माता चांगानको प्रिमियम सब-ब्रान्ड नेभोको नयाँ विद्युतीय एसयूभी दीपल नेभो क्यू०५ नेपाली बजारमा सार्वजनिक गरेको छ । कम्पनीले आइतबार एक कार्यक्रम आयोजना गरी नयाँ विद्युतीय एसयूभी सार्वजनिक गरेको हो ।
कम्पनीका अनुसार नेभो क्यू०५ ले नेपाली बजारमा प्रविधि, आराम, सुरक्षा र विलासिताको संयोजन प्रस्तुत गर्नेछ । नेपालमा बिक्री सुरु भएलगत्तै ग्राहकलाई बिक्रीपछिको सेवा सुनिश्चित गर्न एमएडब्लू नेपालले ७ करोड रुपैयाँभन्दा बढी मूल्यका स्पेयर पार्ट्स तयारी अवस्थामा राखेको जनाएको छ । ग्राहकका लागि २४ घण्टा सञ्चालन हुने हेल्पलाइनको व्यवस्था पनि गरिएको छ ।
नेपालमा नेभो क्यू०५ दुई भेरियन्टमा उपलब्ध हुनेछ । म्याक्स र अल्ट्रा भेरियन्टको मूल्य नाडा अटो शो अवधिका लागि क्रमशः ४६ लाख ९९ हजार र ४९ लाख ९९ हजार रुपैयाँ तोकिएको छ ।
अटो शोपछि भने म्याक्सको मूल्य ४८ लाख ९९ हजार र अल्ट्राको ५१ लाख ९९ हजार रुपैयाँ पुग्ने कम्पनीले जनाएको छ । यस हिसाबले अटो शो अवधिमा ग्राहकले दुवै भेरियन्टमा २ लाख रुपैयाँसम्मको मूल्य लाभ पाउनेछन् ।
४६२ किलोमिटरसम्म रेन्ज
नेभो क्यू०५ मा १२० किलोवाट क्षमताको इलेक्ट्रिक मोटर जडान गरिएको छ । गाडीमा ५२ किलोवाट आवर क्षमताको ‘गोल्डेन शिल्ड २.०’ ब्याट्री प्रयोग गरिएको छ ।
कम्पनीका अनुसार पूर्ण चार्जमा यसले ४६२ किलोमिटरसम्मको रेन्ज प्रदान गर्नेछ । शहरी आवागमनसँगै लामो दूरीको यात्रालाई लक्षित गरेर गाडीको ब्याट्री तथा मोटर संयोजन गरिएको कम्पनीको दाबी छ ।
एसयूभीको डिजाइन इटालीको ‘ए–डिजाइन अवार्ड’मा गोल्ड मेडल जितेको ‘क्लाउड्स एन्ड सोफिया’ कन्सेप्टमा आधारित रहेको कम्पनीले जनाएको छ । ४.५४ मिटर लम्बाइ र २.७३ मिटर ह्विलबेसका कारण यसको क्याबिन तुलनात्मक रूपमा फराकिलो रहेको कम्पनीको भनाइ छ ।
विलासी क्याबिन र स्मार्ट फिचर
नेभो क्यू०५ को क्याबिनमा ८० प्रतिशतसम्म सफ्ट–टच सामग्री प्रयोग गरिएको छ । नौ तहको कुशन सिट तथा ६७ स्थानमा साउन्ड इन्सुलेसन प्रविधि प्रयोग गरिएकाले यात्राका क्रममा आराम र कम आवाजमा यात्रा गर्न सकिने कम्पनीको दाबी छ ।
गाडीमा सुरक्षाका लागि १८ वटा स्मार्ट ड्राइभिङ प्रणाली समावेश गरिएको छ । ट्रान्सप्यारेन्ट च्यासिस, स्वचालित इमर्जेन्सी ब्रेक तथा स्टेयरिङ कन्ट्रोललगायतका सुविधा पनि उपलब्ध छन् ।
मोबाइल एपमार्फत गाडीको चार्जिङ अवस्था, लोकेसन तथा तापक्रम नियन्त्रण गर्न सकिने सुविधा समेत दिइएको छ । यसले चालकलाई गाडीको अवस्थाबारे टाढैबाट जानकारी लिन तथा केही प्रमुख फिचर नियन्त्रण गर्न सहज बनाउने कम्पनीले जनाएको छ ।
ब्याट्रीमा ११ वर्षको वारेन्टी
एमएडब्लू नेपालले नेभो क्यू०५ का ग्राहकलाई ५ वर्षको सवारी साधन वारेन्टी दिने जनाएको छ । ब्याट्री तथा ड्राइभट्रेनमा भने ११ वर्ष वा ३ लाख किलोमिटर, जुन पहिले हुन्छ, त्यतिसम्मको वारेन्टी उपलब्ध गराइने कम्पनीको दाबी छ ।
कम्पनीका अनुसार नेपालमा विद्युतीय सवारीको ब्याट्री तथा ड्राइभट्रेनमा उपलब्ध गराइने यो लामो अवधिको वारेन्टीमध्ये एक हो ।
बिक्रीपछिको सेवामा ग्राहकको विश्वास बढाउन ७ करोड रुपैयाँभन्दा बढीका स्पेयर पार्ट्सको स्टक राखिएको र २४ घण्टा हेल्पलाइन सञ्चालनमा ल्याइएको एमएडब्लू नेपालले जनाएको छ ।
कम्पनीले नेभो क्यू०५ मार्फत नेपाली विद्युतीय एसयूभी बजारमा नयाँ प्रतिस्पर्धा थपिने अपेक्षा गरेको छ । मूल्य, रेन्ज, प्रविधि, सुरक्षा तथा लामो वारेन्टीलाई यसको मुख्य प्रतिस्पर्धात्मक आधारका रूपमा प्रस्तुत गरिएको छ ।
