काठमाडौं । रसुवा लगायत बाढी प्रभावित क्षेत्रका पीडितको राहत तथा उद्धारका लागि प्रधानमन्त्री दैवीप्रकोप उद्धार कोषमा एकै दिन ३८ करोड ५६ लाख ६४ हजार २२२ रुपैयाँ सहयोग प्राप्त भएको छ ।
शुक्रबार अर्थमन्त्री डा. स्वर्णिम वाग्लेमार्फत अर्थ मन्त्रालयमा विभिन्न २७ संस्था तथा व्यक्तिले उक्त रकम हस्तान्तरण गरेका हुन् ।
कोषमा सबैभन्दा ठूलो योगदान सूर्य नेपाल प्रालिले १५ करोड रुपैयाँ गरेको छ । यस्तै, प्राइम बैंकले ३ करोड १० लाख, कृषि विकास बैंकले ३ करोड, नेपाल लाइफ इन्स्योरेन्स कम्पनीले २ करोड ५१ लाख, हिमालयन बुलियन कम्पनीले १ करोड १ लाख तथा एग्रो थाईफुड्स प्रालिले १ करोड रुपैयाँ सहयोग गरेका छन् ।
एसियन लाइफ इन्स्योरेन्सले १ करोड १ लाख र सूर्यज्योति लाइफ इन्स्योरेन्सले १ करोड रुपैयाँ योगदान गरेका छन् । उद्योगी विजयकुमार शाह, पद्मज्योति समूहअन्तर्गतको स्याकार ट्रेडिङ र अन्य दाताबाट पनि १–१ करोड रुपैयाँ सहयोग प्राप्त भएको छ । राजी राणाले व्यक्तिगत रूपमा १ करोड ९ लाख ८० हजार रुपैयाँ योगदान गरेका छन् ।
त्यस्तै, डब्लूडब्लूएफ नेपालले १ करोड, मोरङ अटो वर्क्सले १ करोड ११ लाख, जावलाखेल डिस्टिलरी, हिमालयन डिस्टिलरी, अल्फा अटोमोटिभ र सोलु हाइड्रोपावरका प्रतिनिधिले १–१ करोड रुपैयाँ हस्तान्तरण गरेका छन् ।
नेपाल सिमेन्ट उत्पादक संघले ५१ लाख, मुक्तिनाथ विकास बैंकले ५० लाख, लुम्बिनी विकास बैंकले २५ लाख, नेपाल चिया विकास कर्पोरेसनले ११ लाख र एबाकस इन्साइट्स प्रालिले १५ लाख रुपैयाँ सहयोग गरेका छन् ।
सीएएस ट्रेडिङ हाउस र सिल्भर लाइनिङ प्रालिका अधिकारीले १ लाख ११ हजार रुपैयाँका दरले योगदान गरेका छन् भने अन्य तीन संस्थाबाट २६ लाख ६२ हजार रुपैयाँ प्राप्त भएको अर्थ मन्त्रालयले जनाएको छ ।
शुक्रबार मात्रै अर्थ मन्त्रालयमार्फत प्रधानमन्त्री दैवीप्रकोप उद्धार कोषमा कुल ३८ करोड ५६ लाख ६४ हजार २२२ रुपैयाँ जम्मा भएको हो ।
