काठमाडौं। एसियाली विकास बैंक (एडिबी) ले भोटेकोशी र त्रिशूली नदी प्रणालीमा आएको बाढीबाट प्रभावितको तत्काल उद्धार तथा राहतका लागि ५० लाख अमेरिकी डलर (करिब ७६ करोड रुपैयाँ) अनुदान स्वीकृत गरेको छ ।
एडिबीले शुक्रबार जारी गरेको विज्ञप्तिअनुसार अनुदानबाट खोज तथा उद्धार सामग्री, औषधि, खाद्यान्न, सुरक्षित खानेपानी, अस्थायी आश्रय तथा सरसफाइ सामग्री उपलब्ध गराउनुका साथै आपत्कालीन पूर्वाधार निर्माणमा सहयोग गरिनेछ ।
एडिबीका अध्यक्ष मासातो कान्दाले विपद्को समयमा प्रभावित समुदायले सहायता पर्खेर बस्न नसक्ने बताउँदै तत्काल खाद्यान्न, सुरक्षित पानी, आश्रय र औषधि उपलब्ध गराउन अनुदानले सहयोग गर्ने बताए ।
एडिबीले नेपाल सरकार, राष्ट्रिय विपद् जोखिम न्यूनीकरण तथा व्यवस्थापन प्राधिकरण, संयुक्त राष्ट्रसङ्घीय निकाय तथा अन्य विकास साझेदारसँग समन्वय गरी उद्धार, राहत र पुनःस्थापनाका काममा सहयोग गरिरहेको जनाएको छ ।
यसैगरी, विपद्पछिको आवश्यकता मूल्याङ्कन, पुनःस्थापनाको योजना र सम्भावित पुनःनिर्माणका लागि थप १ लाख ५० हजार अमेरिकी डलर सहयोग उपलब्ध गराउने प्रक्रिया अघि बढाइएको एडिबीले जनाएको छ ।
