काठमाडौँ। सर्वोत्तम सिमेन्ट र जगदम्बा सिमेन्टले संयुक्त रूपमा प्रधानमन्त्री दैवी प्रकोप उद्धार कोषमा एक करोड एघार लाख एघार हजार एक सय एघार रुपैयाँ सहयोग गरेका छन्।
रसुवाको भोटेकोशी नदीमा भदौ १० गते आएको विनाशकारी बाढीबाट प्रभावितहरूको राहत, उद्धार तथा पुनःस्थापनामा सहयोग पुर्याउने उद्देश्यले उक्त रकम प्रदान गरिएको हो।
कम्पनीका तर्फबाट प्रमुख कार्यकारी अधिकृत दिवस न्यौपाने, संचालक टिकाराम न्यौपाने, पूर्व-संचालक बिमलकुमार सावर्थिया, पूर्व-संचालक तेन्जिन लाक्देन, प्रमुख संचालक अधिकृत नवीन प्रकाश अधिकारी तथा कम्पनी सचिव कमलकुमार भारतीको टोलीले सो रकमको चेक अर्थमन्त्री डा. स्वर्णिम वाग्लेलाई हस्तान्तरण गरेको छ।
विपद्को यस कठिन घडीमा प्रभावित नागरिकहरूप्रति ऐक्यबद्धता जनाउँदै कम्पनीले उक्त सहयोग गर्ने निर्णय गरेको जनाएको छ। कोषमार्फत उपलब्ध हुने यस रकमले बाढी प्रभावित परिवारहरूको तत्कालको राहत र पुनःस्थापनामा योगदान पुग्ने विश्वास कम्पनीले लिएको छ।
सामाजिक उत्तरदायित्वलाई प्राथमिकतामा राख्दै आएका यी दुवै कम्पनीले शिक्षा, स्वास्थ्य र पूर्वाधारका क्षेत्रमा समेत विभिन्न कार्य गर्दै आएका छन्। बाढीमा परी निधन भएकाहरूप्रति श्रद्धाञ्जली अर्पण गर्दै कम्पनीले प्रभावित परिवार तथा समुदायको शीघ्र राहत र पुनःस्थापनाको कामना पनि गरेको छ। आगामी दिनमा पनि देश र समुदायलाई आवश्यक परेको समयमा सहयोगलाई निरन्तरता दिने प्रतिबद्धता कम्पनीले व्यक्त गरेको छ।
