काठमाडौं। कालीमाटी फलफूल तथा तरकारी बजार विकास समितिले आइतबारका लागि तरकारी तथा फलफूलको मूल्य सूची सार्वजनिक गरेको छ।
समितिका अनुसार आज बजारमा डल्ले च्याउको मूल्य प्रतिकिलो १ सय रुपैयाँले बढेको छ। आज डल्ले च्याउको औसत मूल्य प्रतिकिलो ५ सय ७५ रुपैयाँ कायम भएको छ, जुन हिजो ४ सय ७५ रुपैयाँ थियो। यद्यपि, केही तरकारीको मूल्यमा भने गिरावट आएको छ।
समितिको तथ्यांक अनुसार आज भिन्डीको मूल्य प्रतिकिलो ५५ रुपैयाँ र स्कुसको मूल्य २० रुपैयाँ कायम भएको छ। हिजो भिन्डी ६५ रुपैयाँ र स्कुस २५ रुपैयाँमा कारोबार भएको थियो।
अन्य तरकारीको मूल्यमा पनि सामान्य हेरफेर देखिएको छ। आज ठूलो नेपाली गोलभेँडा ७५ रुपैयाँ, भारतीय ठूलो गोलभेँडा ८५ रुपैयाँ, सानो लोकल गोलभेँडा ४३ रुपैयाँ र रातो आलु ५३ रुपैयाँ प्रतिकिलोमा बिक्री भइरहेको छ।
त्यस्तै, भारतीय सुकेको प्याज ९२ रुपैयाँ, लोकल गाँजर १ सय १० रुपैयाँ, लोकल बन्दा ३६ रुपैयाँ र स्थानीय काउली ९९ रुपैयाँ प्रतिकिलोमा कारोबार भइरहेको छ।
हरियो तरकारीतर्फ तनेबोडी ६८ रुपैयाँ, मकै बोडी १ सय १ रुपैयाँ, घिउ सिमी ९५ रुपैयाँ, करेला ६५ रुपैयाँ, लौका ६५ रुपैयाँ, लोकल परबल ७५ रुपैयाँ र घिरौँला ५५ रुपैयाँ प्रतिकिलो मूल्य तोकिएको छ।
हरियो डल्ले फर्सी ३५ रुपैयाँ, पाकेको फर्सी ६५ रुपैयाँ, रायोको साग १ सय २५ रुपैयाँ, पालुंगोको साग १ सय ७५ रुपैयाँ, कन्य च्याउ २ सय २५ रुपैयाँ र कुरिलो ४ सय ५० रुपैयाँ प्रतिकिलोमा किनबेच भइरहेको छ।
