काठमाडौं। हङकङमा व्यवसाय गर्दै आएका दीपक गुरुङले भोटेकोसी बाढीपीडितका लागि १० लाख रुपैयाँ बराबरको राहत सामग्री प्रदान गरेका छन्। एसियन प्रोजेक्ट कम्पनीको तर्फबाट सो राहत सामग्री वितरण गरिएको हो।
नुवाकोटको विदुर नगरपालिका-८, त्रिशूली कोलनीमा आश्रय लिइरहेका दुई सय परिवारलाई उक्त सामग्री हस्तान्तरण गरिएको छ। राहतमा बाढीपीडितका लागि तत्काल आवश्यक पर्ने खाद्यान्न, लत्ताकपडा र अन्य दैनिक उपभोग्य वस्तुहरू समावेश छन्। कम्पनीका तर्फबाट सोनम लामाले राहत सामग्री हस्तान्तरणमा सहजीकरण गरेका थिए।
कास्कीको अन्नपूर्ण-९, सावेद स्थायी घर भएका गुरुङले लामो समयदेखि हङकङमा व्यवसाय सञ्चालन गर्दै आएका छन्। आफ्नो मातृभूमिमा आइपरेको विपद्को घडीमा पीडितलाई सहयोग गर्न पाउँदा खुसी लागेको उनले बताए।
गुरुङले बाढीका कारण भएको जनधनको क्षतिप्रति गहिरो दुःख व्यक्त गरेका छन्। साथै, उनले बाढीमा परी ज्यान गुमाएका नागरिकप्रति श्रद्धाञ्जली अर्पण गरेका छन्।
