काठमाडौं। बिहीबारदेखिको अविरल वर्षाका कारण पृथ्वी राजमार्गअन्तर्गत धादिङको कृष्णभीरमा पहिरो खस्दा सडक पूर्ण रूपमा अवरुद्ध भएको छ।
इलाका प्रहरी कार्यालय गजुरीका अनुसार बिहीबार राति सडकको माथिल्लो भागबाट ठूला ढुंगा र चट्टानसहितको पहिरो खसेपछि राजमार्गमा सवारी आवागमन ठप्प भएको हो।
यसअघि गत भदौ १४ गते त्रिशूली नदीमा आएको बाढीले सडकको भित्ता कटान गरेपछि कृष्णभीरमा ठूलो पहिरो गएको थियो।
पहिरोका कारण लामो समयदेखि प्रभावित सडकमा पहिरो गएको स्थानभन्दा करिब २ सय ७० मिटर माथिबाट नयाँ ट्र्याक खोलेर ग्राभेल गरिएको थियो।
नयाँ ट्र्याक निर्माणपछि गत असोज १ गतेदेखि मात्रै पृथ्वी राजमार्गमा दुईतर्फी सवारीसाधन सञ्चालनमा ल्याइएको थियो। तर, पुनः पहिरो खसेपछि राजमार्गमा आवागमन अवरुद्ध भएको हो।
