काठमाडौं: रसुवा, नुवाकोट र धादिङमा आएको बाढीपछिको खोज तथा उद्धार कार्यमा हेलिकोप्टर परिचालन गर्दा ठूलो आर्थिक व्ययभार परेको छ। प्रारम्भिक तथ्यांकअनुसार निजी वायुसेवा कम्पनीका हेलिकोप्टर प्रयोगबापत मात्र १५ करोड रुपैयाँभन्दा बढी खर्च भएको छ। नेपाल वायु सेवा सञ्चालक संघ (एओन) का अनुसार १३ वटा निजी कम्पनीका हेलिकोप्टरहरू उद्धार र राहत वितरणमा खटिएका थिए।
सरकार र निजी वायुसेवा सञ्चालकबीच भएको सम्झौताअनुसार प्रतिघण्टा न्यूनतम १ हजार ८०० अमेरिकी डलर (करिब २ लाख ७५ हजार ४०० रुपैयाँ) भाडादर कायम गरिएको थियो। संघका प्रवक्ता मुरलीधर जोशीका अनुसार बाढी प्रभावित क्षेत्रमा निजी कम्पनीहरूले एक हजारभन्दा बढी उडान भरेका छन्। अगस्ट २६ देखि सेप्टेम्बर ११-१२ सम्म चलेको उक्त उद्धार कार्यमा औसत ५५ घण्टाभन्दा बढी उडान भएको देखिन्छ।
यसैबीच, नेपाली सेनाले पनि बाढीपछिको खोज तथा उद्धारमा व्यापक हेलिकोप्टर परिचालन गरेको छ। सेनाका प्रवक्ता राजराम बस्नेतका अनुसार सेनाले हालसम्म २ हजार २३४ पटक उडान तथा अवतरण (सटिज) गरेको छ। उद्धार कार्यमा सेनाका ७ वटा एयरक्राफ्ट प्रयोग भएका थिए।
सेनाको हेलिकोप्टर उडानको यकिन खर्च आउन बाँकी रहे पनि रक्षा मन्त्रालयले तोकेको भाडादरअनुसार गणना गर्दा यो खर्च ८ करोड ७८ लाख रुपैयाँभन्दा बढी पुग्ने अनुमान गरिएको छ। सेनाले एमआई-१७ र साना अगस्टा हेलिकोप्टरहरू प्रयोग गरेको थियो। सरकारी र निजी क्षेत्रको हेलिकोप्टर परिचालनको कुल खर्च २५ करोड रुपैयाँभन्दा बढी हुने निश्चित देखिएको छ। राष्ट्रिय विपत् जोखिम न्यूनीकरण तथा व्यवस्थापन प्राधिकरणले हाल खर्चको विस्तृत तथ्यांक संकलन गरिरहेको जनाएको छ।
