हेटौंडा। साल्ट ट्रेडिङ कर्पोरेशन मकवानपुरले चाडपर्वलाई लक्षित गरी सुपथ मूल्यमा खाद्यान्न बिक्री सुरु गरेको छ। नेपाल सरकारको निर्देशनबमोजिम कर्पोरेशनले नुन, चिनी, तेल र मैदामा छुट प्रदान गरेको हो।
कार्यालय प्रमुख मधुसुधन अधिकारीका अनुसार सर्वसाधारणलाई समान रूपमा वितरण गर्ने उद्देश्यले प्रतिव्यक्ति ६ पोका नुन, ६ किलोग्राम चिनी, ५ लिटर तेल र ५ किलो मैदा उपलब्ध गराइएको छ। बजार मूल्यको तुलनामा चिनीमा प्रतिकिलो ५ रुपैयाँ, नुनमा प्रतिकिलो २ रुपैयाँ, मैदामा प्रतिकिलो ७ रुपैयाँ र तेलमा प्रतिलिटर ७ रुपैयाँ छुट दिइएको छ। यो सुविधा आगामी तिहारसम्म निरन्तर रहने कार्यालयले जनाएको छ।
