काठमाडौं। बाढी र पहिरोका कारण बागमती र गण्डकी प्रदेशका विभिन्न राजमार्गहरू अवरुद्ध भएका छन्।
नेपाल प्रहरीका अनुसार गत भदौ १० गते आएको बाढीले रसुवाका मुख्य राजमार्गहरू पूर्ण रूपमा ठप्प पारेको छ। अर्को सूचना जारी नभएसम्मका लागि यी मार्गहरू बन्द रहने प्रहरीले जनाएको छ।
यस्तै असोज १० गते बिहान ५:५० बजे रघुगंगा गाउँपालिका-२ बैसरीमा पहिरो खस्दा बेनी-जोमसोम सडक खण्ड पूर्ण रूपमा बन्द भएको छ।
असोज १४ गते अपराह्न ४:४५ बजे बौदिकाली गाउँपालिका-३ जन्ती पहिरोमा खसेको पहिरोका कारण कालीगण्डकी कोरिडोर एकतर्फी मात्र सञ्चालनमा छ। प्रहरीका अनुसार उक्त सडकमा ठूला सवारी साधनहरू आवातजावत गर्न सक्ने अवस्था छैन।
यता मनाङमा आएको बाढीका कारण प्रभावित बेशीसहर-खाङसार सडक खण्ड असोज १८ गते अपराह्न ४:०० बजेदेखि एकतर्फी रूपमा सुचारु भएको छ।
अवरुद्ध राजमार्गहरू खुलाउन र यातायात सहज बनाउन सम्बन्धित निकायहरूसँग समन्वय भइरहेको प्रहरीले जानकारी दिएको छ। यात्रामा निस्कनुअघि सडकको पछिल्लो अवस्थाबारे जानकारी लिन यात्रुहरूलाई आग्रह गरिएको छ।
