काठमाडौं। खाना पकाउने एलपीजी ग्यासको आयात साउनमा हालसम्मकै उच्च भए पनि बजारमा अभाव कायमै छ । एक सिलिन्डरका लागि उपभोक्ता चर्को घाम र साउने झरीमा लामो लाइन बस्न बाध्य छन् ।
नेपाल आयल निगमका अनुसार साउनमा ५४ हजार ५ सय ५ टन ग्यास आयात भएको छ । यसबाट ३८ लाख ३८ हजार ४ सय १० सिलिन्डर भरेर बजार पठाइएको छ । सामान्य अवस्थामा देशभर मासिक करिब ३० लाख सिलिन्डर खपत हुन्छ ।
आयात सामान्यभन्दा बढी भए पनि आपूर्ति सहज नहुनुको मुख्य कारण असार ३१ देखि पूर्ण तौलको १४.२ किलो सिलिन्डर बिक्री सुरु गर्नु रहेको निगमका पूर्वकार्यकारी निर्देशक सुशील भट्टराईले बताए । उनका अनुसार अहिलेको माग सामान्य अवस्थासँग तुलना गर्न नमिल्ने गरी बढेको छ । मागअनुसार आयात र वितरण क्षमता बढाउन नसके आन्तरिक वितरण प्रणालीमा कडा नियमन आवश्यक पर्ने उनको भनाइ छ ।
उपभोक्ता अधिकारकर्मी माधव तिमिल्सिनाले पनि आयातभन्दा वितरण प्रणालीमा कमजोरी रहेको बताए । घरनजिकैका डिलरमार्फत ग्यास वितरणमा कडाइ गर्नुपर्ने उनको सुझाव छ ।
ग्यास विक्रेता महासंघका अध्यक्ष ज्ञानेश्वर अर्यालले वितरण प्रणाली भत्काएर सरकारी हस्तक्षेप बढाउँदा उपभोक्ताले सास्ती पाएको आरोप लगाए । देशभरका ६ हजारभन्दा बढी डिलरलाई विश्वास गरेर वितरण व्यवस्थित गर्नुपर्ने उनले बताए ।
निगमका कार्यकारी निर्देशक नागेन्द्र साहका अनुसार अभावको गुनासो बढेपछि काठमाडौंमा बिक्री केन्द्रबाट ग्यास वितरण गरिएको हो । तर सोमबारदेखि नियमित रूपमा डिलरमार्फत मात्रै ग्यास वितरण गरिनेछ ।
ग्यास उद्योगले दैनिक बिक्री गर्ने डिलर, ठेगाना र सिलिन्डर संख्या बिहान ९ बजेसम्म निगममा बुझाउनुपर्नेछ । डिलरले पनि बिक्री परिमाण र उपभोक्ता विवरण उद्योगलाई दिनुपर्नेछ । जिल्ला प्रशासन, वाणिज्य आपूर्ति तथा उपभोक्ता विभाग र निगमको संयुक्त अनुगमनमा वितरण हुनेछ ।
यसअघि आइतबार काठमाडौं उपत्यकाका नौ स्थानबाट ९ हजार २ सय २६ सिलिन्डर बिक्री भएको थियो । निगमका अनुसार टेकुबाट २ हजार २ सय ५०, ठिमीबाट १ हजार ९ सय ४, बबरमहलबाट ३५, बालाजुस्थित नेपाल ग्यास उद्योगबाट १ हजार र जडीबुटीस्थित एसटिसी केन्द्रबाट ३ सय ८७ सिलिन्डर बिक्री भएको थियो । बाँकी सिलिन्डर अन्य बिक्री केन्द्रबाट वितरण गरिएको थियो ।
