काठमाडौं। प्रधानमन्त्री तथा मन्त्रिपरिषद्को कार्यालयसहित अधिकांश सरकारी निकायका वेबसाइट बिहीबार रातिदेखि एकैपटक अवरुद्ध भएका छन् ।
महत्वपूर्ण सरकारी सूचना तथा सेवा प्रवाहका लागि प्रयोग हुने वेबसाइटहरू एकैपटक पहुँचबाहिर आएपछि यसको कारणबारे चासो बढेको छ ।
विशेषगरी प्रधानमन्त्री तथा मन्त्रिपरिषद्को कार्यालयको वेबसाइटसमेत अवरुद्ध भएपछि सरकारी डिजिटल पूर्वाधारको सुरक्षा र विश्वसनीयतामाथि प्रश्न उठेको छ । यद्यपि, वेबसाइटहरू एकैपटक डाउन हुनुको कारणबारे सरकारले अहिलेसम्म औपचारिक जानकारी सार्वजनिक गरेको छैन ।
प्राविधिक समस्या, सर्भरमा आएको गडबडी वा साइबर सुरक्षासँग सम्बन्धित घटनाका कारण वेबसाइटहरू अवरुद्ध भएका हुन् भन्ने विषयमा समेत यकिन जानकारी सार्वजनिक भएको छैन ।
वेबसाइटहरू पुनः सञ्चालनमा ल्याउन सरकारी प्राविधिक टोलीले काम गरिरहेको जनाइएको छ। प्रधानमन्त्री तथा मन्त्रिपरिषद्को कार्यालयको वेबसाइट हाल पुनः पहुँचयोग्य देखिए पनि अन्य सरकारी निकायका वेबसाइटको अवस्था भने निगरानीमा राखिएको बताइएको छ ।
सरकारी वेबसाइटमा नागरिकका व्यक्तिगत विवरण, प्रशासनिक सूचना तथा विभिन्न संवेदनशील सामग्री रहने भएकाले लामो समयसम्म वेबसाइट अवरुद्ध हुँदा सरकारी सेवा प्रवाह प्रभावित हुनसक्ने जोखिम हुन्छ ।
साथै, एकैपटक ठूलो संख्यामा सरकारी वेबसाइट अवरुद्ध हुनुले सरकारी डिजिटल पूर्वाधारको सुरक्षा, प्रणालीगत कमजोरी र साइबर जोखिमबारे समेत गम्भीर प्रश्न उठाएको छ ।
