काठमाडौं । रसुवाको भोटेकोशीमा आएको बाढीको बहाव धादिङको गल्छी–मलेखु क्षेत्र पार गर्दै तलतर्फ बढेपछि प्रहरीले मुग्लिन–नारायणघाट क्षेत्रमा उच्च सतर्कता अपनाउन आग्रह गरेको छ । त्रिशूली नदी किनारका बस्ती तथा बजार क्षेत्रका स्थानीयलाई सम्भावित जोखिमलाई ध्यानमा राख्दै सुरक्षित स्थानमा जान र आवश्यक परे तत्काल क्षेत्र खाली गर्न प्रहरीले अनुरोध गरेको हो ।
प्रहरीका अनुसार भोटेकोशीमा आएको बाढीको बहाव धादिङको गल्छी–मलेखु क्षेत्र पार गरिसकेको छ । अबको केही घण्टामा उक्त बाढीको बहाव मुग्लिन हुँदै नारायणघाटतर्फ जाने सम्भावना रहेकाले त्रिशूली नदी आसपासका क्षेत्रमा जोखिम बढेको छ ।
बाढीको बहावलाई ध्यानमा राख्दै पृथ्वी राजमार्ग र मुग्लिन–नारायणघाट सडकखण्डमा समेत विशेष सतर्कता अपनाउन प्रहरीले आग्रह गरेको छ । नदी किनारमा रहेका बस्ती, बजार तथा अन्य संवेदनशील क्षेत्रमा रहेका नागरिकलाई सुरक्षित स्थानमा सर्न भनिएको छ ।
प्रहरीले त्रिशूली नदीको बहाव थप बढ्न सक्ने सम्भावना रहेकाले नदी किनार तथा आसपासका क्षेत्रमा नजान सर्वसाधारणलाई आग्रह गरेको छ । जोखिमयुक्त क्षेत्रमा अनावश्यक आवतजावत नगर्न र सम्भावित जोखिमबाट जोगिन स्थानीय प्रशासन तथा सुरक्षा निकायले जारी गर्ने निर्देशन पालना गर्नसमेत अनुरोध गरिएको छ ।
प्रहरीले जारी गरेको सूचनामा रसुवा भोटेकोशीमा आएको बाढी धादिङको गल्छी आसपास पुगेको र केही घण्टामा मुग्लिन पार गर्ने क्रममा रहेकाले पृथ्वी राजमार्ग, मुग्लिन–नारायणघाट राजमार्ग तथा त्रिशूली नदी आसपासका बस्ती र बजार क्षेत्र खाली गरी सुरक्षित स्थानमा रहन आग्रह गरिएको छ ।
बाढीको बहाव नदीको तल्लो तटीय क्षेत्रमा पुग्दै गर्दा त्रिशूली किनारमा रहेका बस्ती र बजारमा जोखिम बढ्न सक्ने भएकाले स्थानीयलाई सतर्क रहन प्रहरीले आग्रह गरेको हो ।
विशेषगरी नदी किनार, पुल तथा जोखिमयुक्त सडक क्षेत्रमा भिडभाड नगर्न र बाढीको अवस्था हेर्न नदीतर्फ नजान प्रहरीले सचेत गराएको छ । सम्भावित क्षति रोक्न सम्बन्धित निकायले आवश्यक सुरक्षा तथा उद्धार तयारीसमेत अघि बढाएका छन् ।
प्रहरीले बाढीको अवस्था निरन्तर अनुगमन भइरहेको जनाएको छ । स्थानीय प्रशासनबाट थप सूचना जारी भए तत्काल पालना गर्न र जोखिम देखिए सुरक्षित स्थानतर्फ सर्नसमेत सर्वसाधारणलाई आग्रह गरिएको छ ।
