काठमाडौं। दशैँ, तिहार तथा छठ पर्व नजिकिएसँगै सडक विभागले देशभरका मुख्य राजमार्गहरूको मर्मत र स्तरोन्नतिलाई तीव्रता दिएको छ।
बाढीपहिरोका कारण जीर्ण बनेका सडकहरूमा यात्रुको यात्रा सुरक्षित बनाउन विभागले विशेष कार्ययोजना लागू गरेको छ। यातायात व्यवसायीहरूले सडक सुरक्षाको ग्यारेन्टी नभएसम्म अग्रिम टिकट नखोल्ने चेतावनी दिएपछि विभागले मर्मतको कामलाई प्राथमिकतामा राखेको हो।
सडक विभागका प्रवक्ता शुभराज न्यौपानेका अनुसार देशभरका संवेदनशील क्षेत्रहरूमा २४० भन्दा बढी हेभी मेसिन र प्राविधिक जनशक्तिलाई चौबीसै घण्टा तयारी अवस्थामा राखिएको छ।
सडक अवरुद्ध भएको खण्डमा अधिकतम दुई घण्टाभित्र यातायात सुचारु गर्ने नीति विभागले लिएको छ। मेसिन सञ्चालनका लागि आवश्यक इन्धन र जनशक्ति फिल्डमै खटाइएको छ। सरकारी स्रोत अपुग भएमा निजी क्षेत्रका उपकरण भाडामा लिने व्यवस्था पनि मिलाइएको छ।
विभागले हाल दुईवटा रणनीतिमा काम गरिरहेको छ। पहिलो, बाढीपहिरोले अवरुद्ध भएका सडकमा नयाँ ट्र्याक खोल्ने र मर्मत गर्ने तथा दोस्रो, खाल्डाखुल्डी पुर्ने र धुलो नियन्त्रण गर्ने। रसुवागढी र पृथ्वी राजमार्गको कृष्णभीर जस्ता चुनौतीपूर्ण स्थानमा काम सम्पन्न भइसकेको छ।
काठमाडौंलाई पूर्वी पहाडसँग जोड्ने बीपी राजमार्गको पुनर्निर्माण ५० प्रतिशतभन्दा बढी सकिएको सडक डिभिजन भक्तपुरले जनाएको छ। बाढीले क्षति पुर्याएका स्थानमा मजबुत संरचना निर्माण गरिएको छ। नागढुंगा-मुग्लिन सडक खण्डका जोखिमयुक्त क्षेत्रमा पनि रोकथामका कामहरू पूरा भएका छन्।
सडक बोर्ड नेपाल र सडक विभागको बजेट परिचालन गरी अमानती विधिबाट समेत मर्मत कार्य भइरहेको छ। विभागले यात्रुहरूलाई यात्रा सुरु गर्नुअघि मौसम र सडकको अवस्थाबारे जानकारी लिन आग्रह गरेको छ।
