काठमाडौं। मनकामना पहुँच मार्गको दोस्रो घुम्तीमुनि पहिरो खसेर सडक प्रभावित भए पनि मनकामना मन्दिर दर्शन र केबुलकार सेवा नियमित रूपमा सञ्चालन भइरहेको छ। मनकामना दर्शन प्रालिले एक विज्ञप्ति जारी गर्दै केबुलकार सेवामा कुनै अवरोध नरहेको र सेवा पूर्ण रूपमा सुरक्षित रहेको जानकारी दिएको छ।
पहिरोका कारण सवारीसाधनलाई साविकको पार्किङ स्थलसम्म पुग्न भने रोक लगाइएको छ। कम्पनीले पूर्वतर्फबाट आउने यात्रुहरूका लागि राजमार्गको देब्रेतर्फ मुग्लिनतर्फ करिब ७० मिटर अगाडि वैकल्पिक पार्किङको व्यवस्था मिलाएको छ। वैकल्पिक पार्किङमा सवारीसाधन राखेर यात्रुहरू पैदलमार्ग हुँदै केबुलकार स्टेसनतर्फ जान सक्नेछन्।
व्यवस्थापनका अनुसार मौसम अनुकूल हुनासाथ सडक मर्मतको कामलाई तीव्रता दिइनेछ। पहुँच मार्गमा केही समस्या देखिए पनि भक्तजनहरूले सहज रूपमा मन्दिर पुगेर दर्शन गर्न सक्ने कम्पनीले जनाएको छ। असहज परिस्थितिलाई मध्यनजर गर्दै कम्पनीले यात्रु तथा भक्तजनहरूलाई आवश्यक सहयोग र समझदारीका लागि अनुरोध गरेको छ।
