गोरखा: खाद्य व्यवस्था तथा व्यापार कम्पनी लिमिटेड गोरखा शाखाले नजिकिँदै गरेको चाडपर्वलाई लक्षित गर्दै चामलको मूल्यमा छुट दिएको छ। कार्यालयले साउन २८ गतेदेखि लागू हुने गरी चामलको मूल्यमा प्रतिकिलो ५ रुपैयाँ घटाएर बिक्री सुरु गरेको हो।
खाद्य व्यवस्था कार्यालयकी प्रमुख रञ्जना केसीका अनुसार कार्यालयको वार्षिक उत्सवको अवसर पारेर सहुलियत मूल्यमा चामल वितरण थालिएको हो। यसअघि ६२ रुपैयाँमा बिक्री हुँदै आएको अरुवा सोना मन्सुली चामल अब ५७ रुपैयाँ र ९२ रुपैयाँ पर्ने स्टिम जिरा मसिना चामल ८७ रुपैयाँमा उपलब्ध छ।
त्यसैगरी, सिर्दिवास डिपो तथा नामरुङ र चुमलिङ बिक्री केन्द्रबाट पनि सहुलियत दरमा चामल बिक्री भइरहेको छ। त्यहाँ अरुवा सोना मन्सुली चामल ६० रुपैयाँ र स्टिम जिरा मसिना चामल ९० रुपैयाँमा बिक्री भइरहेको छ। यसअघि उक्त स्थानहरूमा यी चामल क्रमशः ६५ र ९५ रुपैयाँमा बिक्री हुँदै आएका थिए।
कार्यालयका अनुसार छुट कोटाको मौज्दात नसकिएसम्म उपभोक्ताले सहुलियत मूल्यमा चामल खरिद गर्न पाउनेछन्। मौज्दात सकिएपछि भने चामलको मूल्य पुरानै दरमा कायम हुनेछ। चालु आर्थिक वर्ष २०८३/८४ का लागि सिर्दिवास डिपो, नाम्रुङ र चुम्लिङ बिक्री केन्द्रका लागि प्रति केन्द्र एक हजार क्विन्टल चामलको कोटा निर्धारण गरिएको छ। हाल सिर्दिवास डिपोमा ७०० क्विन्टल चामल मौज्दात रहेको कम्पनीले जनाएको छ।
