काठमाडौं: संस्कृति, पर्यटन तथा नागरिक उड्डयनमन्त्री खडकराज पौडेलले नेपालको पर्यटन क्षेत्रको विकासलाई थप प्रभावकारी बनाउन अन्तरमन्त्रालय समन्वय अनिवार्य रहेको बताएका छन्। ४७औँ विश्व पर्यटन दिवसका अवसरमा आयोजित कार्यक्रममा बोल्दै मन्त्री पौडेलले पर्यटन विकास केवल एक मन्त्रालयको प्रयासबाट मात्र सम्भव नहुने स्पष्ट पारे।
उनले सरकारी निकायहरूबीच प्रभावकारी समन्वय, सरकारी संस्थाको क्षमता अभिवृद्धि र निजी क्षेत्रसँगको निरन्तर सहकार्यमा जोड दिए। मन्त्री पौडेलले भने, ‘पर्यटन विकासलाई एउटै मन्त्रालयको प्रयासबाट मात्र अघि बढाउन सकिँदैन।’ उनले बदलिँदो परिवेशअनुसार संस्थागत क्षमता र सेवा प्रवाहलाई सुदृढ बनाउन सरकार योजनाबद्ध रूपमा अघि बढेको जानकारी दिए।
नेपालको मौलिक संस्कृति, परम्परा र समुदायमा आधारित जात्रा तथा पर्वहरूलाई पर्यटनसँग जोड्नुपर्नेमा उनले जोड दिए। साथै, हिमालयको संरक्षण र त्यसको दिगो पर्यटन उपयोगमा ध्यान दिनुपर्ने आवश्यकता औँल्याउँदै उनले निजी क्षेत्रबाट प्राप्त सुझावहरू कानुन सुधारका लागि महत्त्वपूर्ण हुने बताए।
कार्यक्रममा नेपाल पर्यटन बोर्डका निमित्त प्रमुख कार्यकारी अधिकृत सन्तोष पन्तले भोटेकोसी बाढीले पर्यटन क्षेत्रमा पारेको असरबारे चर्चा गर्दै सुरक्षित पूर्वाधार, समयमै सूचना प्रवाह र प्रभावकारी विपद् तयारी अब अनिवार्य भएको बताए। पाटा फाउन्डेसनका अध्यक्ष एन्ड्रयू जोन्सले नेपालको पर्यटन पुनरुत्थानमा फाउन्डेसनको सहयोग रहने प्रतिबद्धता व्यक्त गर्दै प्रविधिको भूमिकामा जोड दिए।
कार्यक्रममा राष्ट्रिय योजना आयोगका सदस्य प्रा डा सञ्जय आचार्य, पर्यटन समितिकी सभापति सुम्निमा उदास र अन्य सांसदहरूले पर्यटनमा प्रविधिको प्रयोग र रोजगारी संरक्षणका विषयमा धारणा राखेका थिए। सो अवसरमा गाउँ पर्यटन प्रवर्द्धन मञ्च (भिटोफ) नेपालले तीनवटा गाउँलाई ‘वर्ष गन्तव्य गाउँ’ घोषणा गर्दै प्रमाणपत्र प्रदान गरेको थियो।
