काठमाडौँ: भूमिगत विद्युत् वितरण प्रणाली सञ्चालनमा ल्याउन र हिउँदको विद्युत् माग व्यवस्थापन गर्न काठमाडौँका विभिन्न स्थानमा विद्युत् आपूर्ति कटौती गरिने भएको छ। नेपाल विद्युत् प्राधिकरणले असोज १५ गतेदेखि २६ गतेसम्म कुलेश्वर, बानेश्वर, जोरपाटी र कीर्तिपुर वितरण केन्द्रअन्तर्गतका क्षेत्रमा विद्युत् कटौती गर्न लागेको हो।
प्राधिकरणका अनुसार सम्बन्धित क्षेत्रमा बिहान १० बजेदेखि दिउँसो ३ बजेसम्म विद्युत् आपूर्ति बन्द गरी प्राविधिक कार्य गरिनेछ। असोज १५ गते सतुंगल बौथली, १६ गते मच्छेगाउँ दोभान चोक तथा खुसी चोक, १७ गते मुलपानी, १८ गते गर्जुधारा र २० गते पुनः मुलपानी क्षेत्रमा विद्युत् कटौती हुनेछ। त्यस्तै, २१ गते बलम्बु, २२ गते कोटेश्वर-बालकुमारी, २४ गते सिफल, २५ गते सतुंगल धौलागिरी आवास र २६ गते धोबीखोला क्षेत्रमा काम हुनेछ। मौसम प्रतिकूल भएमा भने विद्युत् कटौती गरिने छैन।
काठमाडौँ उपत्यकाको विद्युत् वितरण प्रणालीलाई भूमिगत, सुदृढ र स्वचालित बनाउने उद्देश्यले प्राधिकरणले चरणबद्ध रूपमा काम गरिरहेको छ। यसअन्तर्गत ३३ केभी, ११ केभी तथा ४०० भोल्टेजका लाइन भूमिगत गर्नुका साथै अप्टिकल फाइबरसमेत बिछ्याइनेछ। यो प्रणालीले विद्युत् आपूर्तिमा सुरक्षा र विश्वसनीयता बढाउनुका साथै सहरी क्षेत्रमा जथाभाबी रहेका तारहरू व्यवस्थापन गरी सहरको सौन्दर्य बढाउने अपेक्षा गरिएको छ।
