काठमाडौं । चालु आर्थिक वर्ष २०८३/८४ को पहिलो दुई महिनामा नेपालमा ४ खर्ब ३६ अर्ब ३६ करोड रुपैयाँ रेमिट्यान्स भित्रिएको छ। नेपाल राष्ट्र बैंकका अनुसार गत आर्थिक वर्षको सोही अवधिको तुलनामा विप्रेषण आप्रवाह २३.९ प्रतिशतले बढेको हो।
गत आर्थिक वर्षको साउन र भदौमा विप्रेषण आप्रवाह ३३.१ प्रतिशतले बढेको थियो। यस वर्ष वृद्धिदर तुलनात्मक रूपमा घटे पनि रेमिट्यान्सको कुल रकम भने बढेको छ।
राष्ट्र बैंकका अनुसार २०८३ भदौमा मात्रै २ खर्ब २१ अर्ब ३१ करोड रुपैयाँ रेमिट्यान्स भित्रिएको छ। अघिल्लो वर्षको सोही महिनामा १ खर्ब ७४ अर्ब ६७ करोड रुपैयाँ भित्रिएको थियो।
अमेरिकी डलरमा गणना गर्दा समीक्षा अवधिमा विप्रेषण आप्रवाह १३.५ प्रतिशतले बढेर २ अर्ब ८५ करोड अमेरिकी डलर पुगेको छ। अघिल्लो वर्षको सोही अवधिमा यस्तो वृद्धिदर २७.६ प्रतिशत थियो।
यस अवधिमा खुद द्वितीय आय अर्थात् खुद ट्रान्सफर ४ खर्ब ६९ अर्ब ४४ करोड रुपैयाँ पुगेको छ। अघिल्लो वर्षको सोही अवधिमा यस्तो आय ३ खर्ब ८४ अर्ब ८८ करोड रुपैयाँ थियो।
वैदेशिक रोजगारीमा जाने नेपालीको श्रम स्वीकृतिसम्बन्धी तथ्यांकमा भने मिश्रित अवस्था देखिएको छ। समीक्षा अवधिमा नयाँ तथा संस्थागत र व्यक्तिगत प्रक्रियाबाट अन्तिम श्रम स्वीकृति लिने नेपालीको संख्या ७८ हजार ३२० रहेको छ। अघिल्लो वर्षको सोही अवधिमा यस्तो संख्या ९० हजार १९८ थियो।
त्यस्तै, पुनः श्रम स्वीकृति लिने नेपालीको संख्या ५२ हजार १६३ पुगेको छ। अघिल्लो वर्षको सोही अवधिमा यस्तो संख्या ४५ हजार ८८४ थियो।
रेमिट्यान्स आप्रवाह बढ्दा देशभित्र विदेशी मुद्रा भित्रिने प्रवाहलाई सहयोग पुगेको छ। तर, नयाँ श्रम स्वीकृति लिनेको संख्या घट्नु र रेमिट्यान्स वृद्धिदर अघिल्लो वर्षभन्दा सुस्त रहनुले वैदेशिक रोजगारी तथा विप्रेषणको प्रवृत्तिलाई निरन्तर निगरानी गर्नुपर्ने देखाएको छ।
