काठमाडौँ। अविरल वर्षापछि आएको आकस्मिक बाढीका कारण रसुवाको भोटेकोशी क्षेत्रमा विद्युत् उत्पादन, प्रसारण तथा वितरण प्रणालीका महत्त्वपूर्ण संरचनामा क्षति पुगेपछि विद्युत् आपूर्ति अवरुद्ध भएको छ ।
बाढीका कारण जनधनसँगै घर, सडक, पुल तथा विद्युत् संरचनामा समेत ठूलो क्षति पुगेको प्रारम्भिक जानकारी प्राप्त भएको छ ।
नेपाल विद्युत् प्राधिकरण नुवाकोट वितरण केन्द्रका प्रमुख राजकुमार रमणका अनुसार बाढीका कारण रसुवा भोटेकोशी क्षेत्रमा प्राधिकरणसँग सम्बन्धित विभिन्न जलविद्युत् आयोजना, प्रसारण संरचना, सबस्टेसन तथा वितरण प्रणालीमा क्षति पुगेको हो ।
क्षतिको विस्तृत विवरण सङ्कलन भइरहेको र क्षतिग्रस्त संरचनाको अवस्थाबारे प्राविधिक टोलीले अध्ययन गरिरहेको प्राधिकरणले जनाएको छ ।
बाढीबाट रसुवागढी जलविद्युत् आयोजना, चिलिमे जलविद्युत् केन्द्र, त्रिशूली–३ ‘ए’, त्रिशूली–३ ‘बी’ हब, २२० केभी सबस्टेसन तथा त्रिशूली र देवीघाट जलविद्युत् केन्द्रसँग सम्बन्धित संरचनामा क्षति पुगेको प्रारम्भिक विवरण प्राप्त भएको प्राधिकरणले जनाएको छ। विभिन्न स्थानमा रहेका वितरण संरचनासमेत प्रभावित हुँदा विद्युत् आपूर्ति नियमित गर्न समस्या भएको जनाइएको छ ।
प्राधिकरणका अनुसार बाढीका कारण प्रभावित क्षेत्रमा विद्युत् आयोजनाका उपकरण, उत्पादनगृह, प्रसारण लाइन, सबस्टेसन र वितरण संरचनामा समेत उल्लेख्य क्षति पुगेको प्रारम्भिक जानकारी प्राप्त भएको छ। क्षतिको वास्तविक विवरण स्थलगत निरीक्षण तथा प्राविधिक मूल्याङ्कनपछि मात्रै स्पष्ट हुने प्राधिकरणले जनाएको छ ।
विद्युत् आपूर्ति नियमित गर्न प्राधिकरणले उपलब्ध जनशक्ति र स्रोतसाधन परिचालन गरी हरसम्भव प्रयास गरिरहेको जनाएको छ । बाढीका कारण अवरुद्ध भएका संरचनाको अवस्था मूल्याङ्कन गरी सम्भव भएसम्म छिटो मर्मत तथा पुनःस्थापनाको काम अघि बढाइने पनि प्राधिकरणले जनाएको छ ।
विद्युत् संरचना क्षतिग्रस्त भएका क्षेत्रमा विद्युत् लाइन तथा उपकरणबाट थप जोखिम हुनसक्ने भएकाले स्थानीयवासीलाई सावधानी अपनाउनसमेत आग्रह गरिएको छ ।
