हुम्ला। पहिरोका कारण अवरुद्ध बनेको कर्णाली करिडोरको सिमकोट(हिल्सा सडक खण्डअन्तर्गत च्याछरा सडक पुनः सुचारु भएको छ। चट्टानी भीरबाट ठूला ढुङ्गासहित खसेको पहिरोका कारण आइतबार बिहानदेखि उक्त सडक खण्ड बन्द भएको थियो।
हिल्सा-सिमकोट सडक योजनाका प्रमुख वेलबहादुर नेपालीका अनुसार सडकमा खसेका अवरोधहरू पन्छाएपछि यातायात सुचारु भएको हो। सडक अवरुद्ध हुँदा हिल्सातर्फ जान लागेका छ वटा जीपहरु रोकिएका थिए, जुन अहिले आफ्नो गन्तव्यतर्फ लागेका छन्। यद्यपि, पहिरोमा खसेको ठूलो ढुङ्गा भने पूर्ण रूपमा पन्छाउन बाँकी छ।
सडक अवरुद्ध हुँदा रोकिएका बीस जना पर्यटकहरू पनि अहिले आफ्नो यात्रामा अघि बढेका छन्। कैलाश मानसरोवर दर्शनका लागि निस्किएका ती पर्यटकहरूले पहिरो पन्छाएपछि पैदल मार्ग हुँदै हिल्सातर्फको यात्रा तय गरेका हुन्।
