काठमाडौँ- पृथ्वी राजमार्ग अन्तर्गत धादिङको कृष्णभिरमा सडक भासिएपछि पछिल्ला तीन दिनमा वैकल्पिक मार्ग प्रयोग गरी ८७ हजारभन्दा बढी ग्यास सिलिन्डर काठमाडौँ भित्र्याइएको छ।
नेपाल आयल निगमका अनुसार विभिन्न १८ वटा कम्पनीले बारा, पर्सा, मकवानपुर, चितवन, नवलपरासी, धनुषा तथा महोत्तरीमा रहेका उद्योगबाट ८७ हजार ८७७ वटा सिलिन्डर काठमाडौँ ल्याएका हुन्। निगमका प्रवक्ता मनोज ठाकुरका अनुसार भदौ १८ गते २४ हजार ४९४, भदौ १९ गते ३४ हजार १३४ र भदौ २० गते २९ हजार २४९ वटा सिलिन्डर उपत्यका भित्रिएका छन्।
भदौ १४ गते त्रिशूली नदीको कटानका कारण पृथ्वी राजमार्गको कृष्णभिरमा सडक अवरुद्ध भएपछि इन्धन बोकेका ट्याङ्कर र ग्यास बुलेट बाटोमै रोकिएका थिए। त्यसपछि निगमले वैकल्पिक मार्गमार्फत पेट्रोलियम पदार्थ र एलपी ग्यासको आपूर्ति निरन्तर गराएको हो। निगमले ग्यास आपूर्ति सहज बनाउन सार्वजनिक बिदाका दिनमा पनि ग्यास उद्योगलाई पुनः भर्ने र ढुवानी कार्य नियमित गर्न निर्देशन दिएको छ।
