काठमाडौं। सिटिजन्स बैंक इन्टरनेसनल लिमिटेडले भोटेकोशी नदीमा आएको बाढीबाट प्रभावितहरूको उद्धार र राहतका लागि प्रधानमन्त्री दैवी प्रकोप उद्धार तथा राहत कोषमा रु. २ करोड २२ लाख २२ हजार २ सय २२ सहयोग प्रदान गरेको छ।
सिंहदरबारस्थित अर्थ मन्त्रालयमा आज आयोजित एक कार्यक्रममा बैंकका अध्यक्ष प्रबल जंग पाण्डेले अर्थमन्त्री डा. स्वर्णिम वाग्लेलाई उक्त रकम बराबरको चेक हस्तान्तरण गर्नुभएको हो। कार्यक्रममा बैंकका सञ्चालक समिति सदस्य दिग्विजय विष्ट र प्रमुख कार्यकारी अधिकृत गणेशराज पोखरेलको उपस्थिति थियो। बैंकले बाढीबाट ज्यान गुमाएकाप्रति समवेदना व्यक्त गर्दै घाइतेहरूको शीघ्र स्वास्थ्य लाभको कामना गरेको छ।
यसबाहेक, बाढीका कारण पूर्ण रूपमा क्षतिग्रस्त भएको बैंकको देवीघाट शाखाले नुवाकोटको विदुर नगरपालिका-५ मा प्रभावित स्थानीयलाई चामल, दाल, पिठो, तेल, नुन र अन्य खाद्यान्न सामग्री वितरण गरेको छ। बैंकले आफ्नो संस्थागत सामाजिक उत्तरदायित्व अन्तर्गत शिक्षा र स्वास्थ्य क्षेत्रमा सहयोग गर्दै आएको र आगामी दिनमा पनि यस्ता कार्यलाई निरन्तरता दिने जनाएको छ।
सिटिजन्स बैंकले हाल देशभरका ६१ जिल्लामा २०० शाखा, १६९ एटीएम, ३ विस्तारित काउन्टर र ४२ शाखा रहित बैंकिङ इकाइमार्फत २० लाख ६० हजार ग्राहकलाई सेवा प्रदान गर्दै आएको छ।
