बाजुरा। बाजुराका महिलाहरू यतिबेला धान काट्ने काममा व्यस्त छन्।
चैत-वैशाखमा पाखो जमिनमा लगाइएको धान पाकेर पहेँलिएपछि किसानहरू यसलाई भित्र्याउने हतारोमा छन्। तर, लगातारको वर्षाका कारण धानबाली सुरक्षित रूपमा घर भित्र्याउन निकै समस्या भएको छ।
बुढीगङ्गा नगरपालिका-१० की स्थानीय दुर्गा नेपालीले धान पाकेर झर्न थालेकाले बिहानदेखि दिउँसोसम्म काट्ने काममा खटिनुपरेको बताए।
उनका अनुसार भदौ महिनामा प्रायः खाद्यान्नको अभाव हुने भएकाले चैत-वैशाखमा लगाइएको धानबालीले ठूलो राहत दिन्छ। तर, धान भित्र्याउने समयमै वर्षा हुँदा परालसमेत जोगाउन किसानलाई सकस परेको छ।
बाजुराका हिमाली, स्वामिकार्तिक खापर, जगन्नाथ, गौमुल, बडीमालिका, बुढीगङ्गा, त्रिवेणी र खप्तड छेडेदह लगायतका पालिकामा पाखो जमिनको धानबाली पाकेको छ। अविरल वर्षाका कारण आएको बाढीपहिरोले बाटो बिग्रिएकाले टाढाको बारीबाट धान घरसम्म ओसार्न थप कठिनाइ भएको छ।
कृषि ज्ञान केन्द्र बाजुराका सूचना अधिकारी प्रेमराज न्यौपानेका अनुसार जिल्लाको कुल २२ हजार हेक्टर खेतीयोग्य जमिनमध्ये ६ हजार ९१५ हेक्टरमा धान खेती गरिन्छ। यहाँ धानको उत्पादकत्व प्रतिहेक्टर १.९ मेट्रिक टन रहेको छ।
