भोटेकोसीमा आएको बाढीका कारण रसुवागढी नाकाको सडक प्रभावित भएपछि कम्पनीले गाडी ढुवानीका लागि कोरला नाकालाई वैकल्पिक मार्गका रूपमा प्रयोग गरेको छ। यस व्यवस्थाले सडक अवरोधका बाबजुद पनि ढुवानी र डेलिभरी कार्यलाई निरन्तरता दिन सहज भएको कम्पनीले बताएको छ।

हालै सम्पन्न नाइमा नेपाल मोबिलिटी एक्स्पो २०२६ मा सार्वजनिक गरिएको हावाल जोलियन म्याक्स ईभी जीडब्ल्यूएमको ओरा ५ पछि बजारमा आएको दोस्रो पूर्ण विद्युतीय एसयूभी हो। यसको सुरुवाती मूल्य ५९ लाख ९९ हजार रुपैयाँ तोकिएको छ। कम्पनीका अनुसार यी दुवै मोडलले नेपाली ग्राहकबाट उत्साहजनक प्रतिक्रिया पाइरहेका छन्। विशेषगरी नयाँ पुस्ताको डिजाइन र विद्युतीय प्रविधिका कारण प्रिमियम एसयूभी सेगमेन्टमा यी गाडीप्रति ग्राहकको चासो बढेको छ।

भीजी इम्पेक्सले प्राप्त बुकिङहरू क्रमशः प्रशोधन भइरहेको र डेलिभरी तालिकाको जानकारी छिट्टै सार्वजनिक गरिने जनाएको छ। कम्पनीले बुकिङदेखि डेलिभरीसम्मको प्रक्रियालाई व्यवस्थित बनाउन ध्यान केन्द्रित गरेको छ। साथै, जीडब्ल्यूएम नेपालले आफ्नो उपस्थितिलाई थप विस्तार गर्दै विश्व बजारमा उपलब्ध आधुनिक तथा विद्युतीय प्रविधियुक्त थप लक्जरी मोडलहरू भित्र्याउने योजना बनाएको छ।