काठमाडौं। अर्थमन्त्री डा. स्वर्णिम वाग्लेले विश्वविजय पराजुलीलाई आफ्नो ‘मानवीय मामिला’ सल्लाहकारमा नियुक्त गरेका छन्। भदौ २४ गतेको मन्त्रीस्तरीय निर्णयअनुसार उनलाई आगामी मंसिर मसान्तसम्मका लागि अवैतनिक सल्लाहकारको रूपमा नियुक्त गरिएको हो।
अर्थ मन्त्रालयका अनुसार रसुवामा गएको बाढीपश्चात् मन्त्रालयले गर्नुपर्ने मानवीय हितका काममा सहयोग पुर्याउने उद्देश्यले छोटो अवधिका लागि यो नियुक्ति गरिएको हो। पराजुलीसँग संयुक्त राष्ट्र संघ (यूएन) मा काम गरेको लामो र गहन अनुभव छ। मन्त्रालयले उनको अनुभव नेपालमा विपत्पश्चात्को मानवीय राहत र पुनर्स्थापनाको काममा निकै उपयोगी हुने विश्वास लिएको छ।
विशेषगरी विपत् जोखिम न्यूनीकरण र व्यवस्थापनमा पराजुलीको विज्ञताले मन्त्रालयको कामलाई थप प्रभावकारी बनाउन मद्दत पुग्ने मन्त्रालयले जनाएको छ। अर्थमन्त्री वाग्लेले पराजुलीलाई नियुक्तिपत्र हस्तान्तरण गर्दै उनको सफल कार्यकालको कामना गरेका छन्।
