काठमाडौं । माछापुच्छ्रे बैंक लिमिटेडले आफ्ना सेयरधनीलाई कुल ६ प्रतिशत लाभांश वितरण गर्ने प्रस्ताव गरेको छ।
बैंकको सञ्चालक समितिको ५६४औँ बैठकले चुक्तापुँजीको ६ प्रतिशत लाभांश वितरण गर्ने प्रस्ताव गरेको हो। प्रस्तावित लाभांशमा ३ प्रतिशत बोनस सेयर र ३ प्रतिशत नगद लाभांश (करसहित) रहेको छ।
सञ्चालक समितिको भदौ २६ गते अपराह्न बसेको बैठकले लाभांश वितरण गर्ने प्रस्ताव गरेको बैंकले जनाएको छ।
प्रस्तावित लाभांश नेपाल राष्ट्र बैंकबाट स्वीकृत भई बैंकको आगामी वार्षिक साधारणसभाबाट पारित भएपछि सेयरधनीलाई वितरण गरिनेछ।
हाल माछापुच्छ्रे बैंकले सातवटै प्रदेशमा १५७ शाखा, १२ एक्सटेन्सन काउन्टर, ८८ शाखारहित बैंकिङ सेवा तथा १९३ एटीएममार्फत सेवा दिइरहेको छ। बैंकका अनुसार यी सञ्जालमार्फत १८ लाखभन्दा बढी ग्राहकले बैंकिङ सेवा लिइरहेका छन्।
