काठमाडौं। जिल्ला प्रशासन कार्यालय काठमाडौंले कार्यालय परिसरबाट गर्दै आएको खाना पकाउने ग्यासको बिक्री वितरण अर्को सूचना जारी नभएसम्मका लागि स्थगित गरेको छ।
नेपाल आयल निगमसँगको समन्वयमा विगत तीन दिनदेखि कार्यालयले उपभोक्तालाई लक्षित गरी परिसरबाटै ग्यास उपलब्ध गराउँदै आएको थियो। विशेषगरी डेरामा बस्ने विद्यार्थी, ज्येष्ठ नागरिक, अपाङ्गता भएका व्यक्ति, सुत्केरी तथा गर्भवती महिला र साना बालबालिका भएका परिवारलाई प्राथमिकतामा राखेर यो सेवा सञ्चालन गरिएको थियो।
प्रशासकीय अधिकृत तारानाथ फुल्लेलका अनुसार कार्यालयको नियमित कार्यका साथै रसुवा बाढीपीडितका लागि राहत व्यवस्थापन र बाढीमा परी मृत्यु भएकाहरूको शव व्यवस्थापनमा कर्मचारीहरू खटिनुपर्ने भएकाले यो सेवा तत्कालका लागि बन्द गरिएको हो। भदौ २९ गते सोमबारदेखि यो निर्णय कार्यान्वयनमा आएको छ।
यद्यपि, ग्यासको बिक्री वितरण पूर्ण रूपमा बन्द भने नहुने कार्यालयले स्पष्ट पारेको छ। उपभोक्ताहरूले सम्बन्धित ग्यास विक्रेता, डिलर तथा खुद्रा पसलमार्फत नियमित रूपमा ग्यास खरिद गर्न सक्नेछन्।
