काठमाडौं। नेपाल राष्ट्र बैंकले बैंक तथा वित्तीय संस्थालाई एटीएम मेसिनबाट एक सय रुपैयाँ दरका नोट वितरण गर्ने व्यवस्था मिलाउन आग्रह गरेको छ।
केन्द्रीय बैंकको मुद्रा व्यवस्थापन विभागले नेपाल बैंकर्स संघलाई पत्र पठाउँदै यस्तो निर्देशन दिएको हो।
हाल बैंकहरूले एटीएमबाट १ हजार र ५ सय रुपैयाँ दरका नोटहरू मात्र वितरण गर्दै आएका छन्। अब सर्वसाधारणले एटीएममार्फत १ सय रुपैयाँका नोट पनि प्राप्त गर्न सक्नेछन्।
नजिकिँदै गरेको बडादशैंलाई मध्यनजर गर्दै राष्ट्र बैंकले यो व्यवस्था कार्यान्वयन गर्न आग्रह गरेको हो। यसबाट दशैंको समयमा साना दरका नोट साट्न बैंक तथा वित्तीय संस्थामा पुग्ने ग्राहकको भीड उल्लेख्य रूपमा कम हुने बैंकले जनाएको छ।
