भैरहवा। भारतबाट रुपन्देहीको भलवारी डिपोका लागि ल्याइँदै गरेको पेट्रोलियम पदार्थ बाटोमै चोरी भएको छ ।
लुम्बिनी प्रदेश प्रहरी कार्यालय दाङ र वडा प्रहरी कार्यालय भैरहवाको संयुक्त टोलीले मङ्गलबार बिहान करिब १० बजे भैरहवास्थित सराफ आयल सेन्टरमा छापा मारी तीन वटा ट्यांकर नियन्त्रणमा लिएको छ ।
प्रहरीका अनुसार लु.२ ख १५४४ र लु.१ ख ६५०४ नम्बरका ट्यांकर तेल निकालिरहेको अवस्थामा फेला परेका थिए भने लु.१ ख ६६१९ नम्बरको ट्यांकर फरार भएको थियो । पछि प्रहरीले पिछा गरी फरार ट्यांकर लाई पनि नियन्त्रणमा लिएको छ ।
लुम्बिनी प्रदेश प्रहरी प्रमुख प्रहरी नायब महानिरीक्षक भूपेन्द्र खत्रीले ट्यांकरको सिल तोडेर तेल निकालिएको पाइएको बताए ।
प्रहरीले घटनामा संलग्न एक जना सहचालकलाई नियन्त्रणमा लिएर अनुसन्धान अघि बढाएको छ । नेपाल आयल निगम लुम्बिनी प्रदेश डिपो भलवारीका निमित्त प्रमुख सुरेन्द्र विष्टका अनुसार करिब ३० लिटर डिजेल निकालिसकेको अवस्थामा ट्यांकर फेला परेका थिए ।
विष्टले भने, “सिल तोडेर तेल निकाल्दै गरेको अवस्थामा प्रहरीले ट्याङ्कर र सहचालकलाई नियन्त्रणमा लिएको हो । यो घटनामा संलग्नमाथि कानुन अनुसार कारबाही हुन्छ ।”
ढुवानीका क्रममा सिल तोडेर तेल चोरी हुने गरेका घटनाले ढुवानी व्यवस्थापन र नापजाँच प्रणालीमाथि प्रश्न उठाएको छ । ट्यांकर व्यवसायी र पेट्रोल पम्प सञ्चालकको मिलेमतोमा यस्ता गतिविधि हुने गरेको आशंकामा प्रहरीले थप अनुसन्धान गरिरहेको छ ।
प्रहरीले घटनामा संलग्न व्यक्तिको भूमिका र निकालिएको तेलको वास्तविक परिमाणबारे विस्तृत विवरण सङ्कलन गरिरहेको जनाएको छ ।
