काठमाडौ । सार्वजनिक खरिद अनुगमन कार्यालयले विभिन्न पाँच निर्माण व्यवसायी तथा आपूर्तिकर्तालाई कालोसूचीमा राखेको छ।
कार्यालयले आज सार्वजनिक सूचना जारी गर्दै सम्बन्धित निकायबाट प्राप्त पत्रका आधारमा सार्वजनिक खरिद ऐन, २०६३ को दफा ६३ को उपदफा (१) बमोजिम उनीहरूलाई कालोसूचीमा राखिएको जनाएको हो।
सूचनाअनुसार कालोसूचीमा राख्ने निर्णय सूचना प्रकाशित भएको मितिदेखि लागू हुनेछ। कालोसूचीमा परेका निर्माण व्यवसायी तथा आपूर्तिकर्ताले तोकिएको अवधिभर सार्वजनिक निकायबाट हुने कुनै पनि खरिद प्रक्रियामा सहभागी हुन पाउने छैनन्।
सार्वजनिक खरिद अनुगमन कार्यालयले कालोसूचीमा परेका व्यवसायी तथा आपूर्तिकर्तालाई सो अवधिमा सार्वजनिक खरिद प्रक्रियामा भाग नलिनसमेत जनाएको छ।
