काठमाडौं। पाल्पा कारागारमा रहेका कैदीबन्दीहरूले भोटेकोशी बाढीपीडितका लागि रु ८३ हजार आर्थिक सहयोग गरेका छन्। कारागारमा रहेका २३७ जना कैदीबन्दीले आफ्नो क्षमताअनुसार रकम सङ्कलन गरी सो सहयोग उपलब्ध गराएका हुन्।
कारागारका प्रशासक भगवानभक्त अर्यालका अनुसार सङ्कलित रकम राष्ट्रिय वाणिज्य बैंकमार्फत प्रधानमन्त्री दैवी प्रकोप उद्धार कोषमा जम्मा गरिएको छ। कैदीबन्दीहरूले कारागारभित्र मुढा बनाउने, सिलाइबुनाइ, डोको नाम्लो बुन्ने र बात्ती बनाउने जस्ता सीपमूलक कामबाट आर्जन गरेको रकमबाट यो सहयोग गरेका हुन्।
अर्यालले भने, ‘हामी जहाँ भए पनि समाजकै सदस्य हौँ भन्ने भावनाका साथ कैदीबन्दीले रकम सङ्कलन गरेका हुन्। उनीहरूको सहयोगको आकार ठूलो नहुन सक्छ, तर विपद्का बेला पीडितप्रति देखाएको मानवीय समवेदना भने अर्थपूर्ण छ।’
यसैबीच, तनहुँका विभिन्न संस्थाले पनि बाढीपीडितका लागि सहयोग गरेका छन्। नेपाल मगर संघ भिमादले रु एक लाख ९५ हजार सहयोग गरेको छ।
संघका अध्यक्ष ज्ञानबहादुर थापाका अनुसार समितिका सदस्यहरूबाट रकम सङ्कलन गरी बाढी प्रभावितको राहत तथा पुनःस्थापनाका लागि सो रकम प्रदान गरिएको हो। त्यस्तै, ढोर फिरफिरे तमु समाजले पनि सदस्यहरूबाट स्वेच्छिक रूपमा रकम सङ्कलन गरी रु एक लाख ५६ हजार ५१५ सहयोग गरेको छ।
