काठमाडौं। सिटिजन्स बैंक इन्टरनेसनल लिमिटेडले कर्णाली प्रदेशमा आफ्नो कार्यसम्पादन तथा रणनीतिक समीक्षा कार्यक्रम सम्पन्न गरेको छ।
बैंकले ओभरकमिङ डिस्टेन्स, डेलिभरिङ रिजल्ट्सः परफर्मेन्स एन्ड स्ट्राटेजिक ग्रोथ रिभ्यू – कर्णाली प्रोभिन्स २०८३/८४ शीर्षकमा उक्त कार्यक्रम आयोजना गरेको हो। कार्यक्रममा बैंकका प्रमुख कार्यकारी अधिकृत गणेशराज पोखरेल, नायव प्रमुख कार्यकारी अधिकृत र अन्य उच्च व्यवस्थापनका अधिकारीहरूको उपस्थिति थियो।
समीक्षा कार्यक्रममा गत आर्थिक वर्षको प्रगति, चालू आर्थिक वर्षको बजेट, रणनीतिक योजना र मुख्य प्राथमिकताका विषयमा छलफल भएको बैंकले जनाएको छ।
साथै, ग्राहक सेवाको गुणस्तर सुधार र केन्द्र तथा प्रदेशबीचको सहकार्यलाई थप प्रभावकारी बनाउने विषयमा अन्तरक्रिया गरिएको थियो। हाल कर्णालीका ८ जिल्लामा बैंकका ११ वटा शाखा सञ्चालनमा छन्। बैंकले यसअघि नै बागमती, कोशी, मधेश र सुदूरपश्चिम प्रदेशमा यस्तै कार्यक्रम सम्पन्न गरिसकेको छ।
बैंकले आर्थिक वर्ष २०८२/८३ मा व्यवसाय विस्तार र नाफामा उल्लेख्य प्रगति गरेको छ। समीक्षा अवधिमा बैंकको कर्जा प्रवाह १.२४ प्रतिशतले बढेर रु १ खर्ब ७७ अर्ब ३३ करोड पुगेको छ भने निक्षेप संकलन ९.२२ प्रतिशतले वृद्धि भई रु २ खर्ब ३३ अर्ब ८१ करोड पुगेको छ। यस अवधिमा बैंकको खुद नाफा ६३.०५ प्रतिशतले बढेर रु २ अर्ब ९ करोड ८६ लाख पुगेको छ।
बैंक अफ द इयर २०२४ र २०२५ को उपाधि प्राप्त सिटिजन्स बैंकले हाल देशभर ६१ जिल्लामा २०० शाखा, १६७ एटीएम, ३ विस्तारित काउन्टर र ४२ शाखारहित बैंकिङ इकाइमार्फत करिब २० लाख ६४ हजार ग्राहकलाई सेवा दिइरहेको छ। बैंकले भर्चुअल क्रेडिट कार्ड, जेन-जी सेभिङ अकाउन्ट र फ्रिलान्सर सेभिङ अकाउन्ट लगायतका डिजिटल सेवाहरू पनि प्रदान गर्दै आएको छ।
