काठमाडौं। चालु आर्थिक वर्ष २०८३/८४ को पहिलो महिना साउनमा नेपाल भित्रिने रेमिट्यान्स आप्रवाह २१.२ प्रतिशतले बढेको छ । नेपाल राष्ट्र बैंकका अनुसार साउनमा २ खर्ब १५ अर्ब ५ करोड रुपैयाँ रेमिट्यान्स नेपाल भित्रिएको हो ।
अघिल्लो आर्थिक वर्षको सोही अवधिमा रेमिट्यान्स आप्रवाह २९.९ प्रतिशतले बढेको थियो । यस वर्ष साउनमा रेमिट्यान्सको वृद्धि दर केही सुस्त देखिए पनि कुल रकम भने उच्च स्तरमा पुगेको छ ।
अमेरिकी डलरमा साउनको रेमिट्यान्स आप्रवाह १०.२ प्रतिशतले बढेर १ अर्ब ४० करोड डलर पुगेको छ । अघिल्लो आर्थिक वर्षको सोही अवधिमा डलरमा रेमिट्यान्स आप्रवाह २५ प्रतिशतले बढेको थियो ।
समीक्षा अवधिमा खुद द्वितीय आय (खुद ट्रान्सफर) पनि बढेको छ । राष्ट्र बैंकका अनुसार साउनमा खुद द्वितीय आय २ खर्ब २९ अर्ब ९८ करोड रुपैयाँ पुगेको छ । अघिल्लो आर्थिक वर्षको सोही अवधिमा यस्तो आय १ खर्ब ९३ अर्ब ८५ करोड रुपैयाँ थियो ।
यता, वैदेशिक रोजगारीका लागि अन्तिम श्रम स्वीकृति लिने नेपालीको संख्या भने घटेको छ । साउनमा संस्थागत तथा व्यक्तिगत–नयाँतर्फ गरी ४२ हजार ६९३ जनाले अन्तिम श्रम स्वीकृति लिएका छन् । अघिल्लो आर्थिक वर्षको सोही अवधिमा यस्तो संख्या ४४ हजार ४६६ थियो ।
तर, पुनः श्रम स्वीकृति लिने नेपालीको संख्या भने बढेको छ । साउनमा २७ हजार ७४८ जनाले पुनः श्रम स्वीकृति लिएका छन् । अघिल्लो आर्थिक वर्षको सोही अवधिमा २३ हजार ६४४ जनाले पुनः श्रम स्वीकृति लिएका थिए ।
यसले नयाँ श्रम स्वीकृति लिनेको संख्या केही घटे पनि विदेशमा कार्यरत नेपालीबाट नेपाल भित्रिने रेमिट्यान्स तथा पुनः श्रम स्वीकृति लिनेको संख्या बढेको देखाएको छ ।
