काठमाडौं। कृत्रिम बौद्धिकता (एआई) प्रविधिप्रतिको विश्वव्यापी माग र अमेरिका-चीनबीचको व्यापारिक तथा एआईसम्बन्धी वार्ताले सकारात्मक प्रभाव पार्दा सोमबार अधिकांश एसियाली शेयर बजारमा वृद्धि देखिएको छ।
अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चिनफिङबीच बिहीबार वासिङ्टनमा हुने शिखर वार्ताअघि दुवै मुलुकका आर्थिक अधिकारीहरूले आइतबार छलफल गरेका थिए।
अमेरिकी अर्थमन्त्री स्कट बेस्सेन्टका अनुसार दुवै पक्षले ‘अमेरिका-चीन एआई संवाद’ नामक संयन्त्र स्थापना गर्ने विषयमा छलफल गरेका छन्। चिनियाँ सरकारी सञ्चारमाध्यमले वार्तालाई स्पष्ट, गहन र रचनात्मक भएको जनाएका छन्। क्विन्टेक्स इन्टेलका विश्लेषक स्टेफन इनेसका अनुसार बजारले दुई मुलुकबीचको व्यापारिक तनाव थप नबढ्ने सङ्केतको प्रतीक्षा गरिरहेको छ।
सोमबार कारोबार सुरु भएको एक घण्टामा हङकङको शेयर सूचकाङ्क शून्य दशमलव ५ प्रतिशतले बढेको छ। दक्षिण कोरियाको प्रविधि केन्द्रित सूचकाङ्क १ दशमलव ५ प्रतिशत र साङ्घाई शेयर बजार शून्य दशमलव ५ प्रतिशतले उकालो लागेका छन्। सार्वजनिक बिदाका कारण जापानको टोकियो बजार बन्द रह्यो भने अष्ट्रेलियाको सिड्नी बजारमा सामान्य गिरावट देखिएको छ।
यसैबीच मुद्रास्फीति नियन्त्रणका लागि विश्वभरका केन्द्रीय बैङ्कहरूले मौद्रिक नीति कडा बनाइरहेका छन्। अमेरिका-इरान द्वन्द्वका कारण कच्चा तेलको मूल्य प्रतिव्यारेल १०० अमेरिकी डलरको हाराहारीमा रहँदा केन्द्रीय बैङ्कहरू थप दबाबमा छन्।
साउदी अरेबियाले पाइपलाइनमार्फत हुने कच्चा तेलको आपूर्ति पुनः सञ्चालन गर्ने तयारी गरेपछि सोमबार अन्तर्राष्ट्रिय बजारमा तेलको मूल्यमा केही कमी आएको छ। जापानको केन्द्रीय बैङ्कले ब्याजदर तीन दशकयताकै उच्च स्तरमा पुर्याए पनि येनको मूल्यमा भने गिरावट देखिएको छ।
