सिन्धुपाल्चोक । जुगल गाउँपालिका–४ को ठूलो कत्तिके र सानु कत्तिके जोड्ने पुल जीर्ण बन्दा स्थानीय र पर्यटकलाई सास्ती भएको छ ।
स्थानीय सरकारले विसं २०७३ मा च्याल्तचाम खोलामाथि निर्माण गरेको पुलबाट स्थानीयले आवतजावत गर्दै आएका थिए । हाल पर्यटकहरु सोही पुलबाट जुगल हिमाल बेसक्याम्पसम्म पुग्ने गरेका छन् ।
पुल भाँचिएर जीर्ण हुँदा आपूmहरुलाई आउजाउ गर्न समस्या भएको स्थानीयको दुखेसो छ । “हामी यही पुल भएर आउजाउ गर्दै आएका थियौँ, अब पुलबाट हिँड्न डर मर्नु छ,” स्थानीय देव लामाले भने, “पुल बिग्रिएको एक वर्ष हुँदा पनि स्थानीय सरकारले वास्ता गरेको छैन ।”
जुगल गाउँपालिकाले आन्तरिक एवम् बाह्य पर्यटकलाई जुगल हिमालसम्म पु¥याउने उद्देश्यले जुगल भ्रमण वर्ष २०८३ घोषणा गरेको छ तर पर्यटक आवतजावत गर्ने पुल जीर्ण भएकाले भ्रमण वर्षको औचित्यमै प्रश्न उठेको स्थानीय ल्हालुङ लामा बताउँछन् । जुगल हिमाल घुम्ने आउने पर्यटकको सिजन सुरु भएको छ ।
“हाल ठूलो कत्तिके र सानु कात्तिके जोड्ने पुल जीर्ण अवस्थामा छ,” उनले भने, “यस्तो अवस्थामा पर्यटक आउन सक्ने देखिँदैन, जसले गर्दा जुगल भ्रमण वर्षमाथि नै प्रश्न उठेको छ । पर्यटकलाई आकर्षित गर्ने हो भने सुरक्षित बाटो र पुल पनि चाहिन्छ ।” पुललाई अलपत्र नराखी तत्काल मर्मत वा नयाँ पुल निर्माण गर्नुपर्ने उनको भनाइ छ ।
गाउँपालिका अध्यक्ष रेशम स्याङ्बोले सो ठाउँमा रहेको जीर्ण पुल हटाई बेलिब्रिज निर्माण गरिने जानकारी दिए । “पुल जीर्ण भएको हामीलाई जानकारी प्राप्त भएपछि पालिकाले विज्ञ प्राविधिकलाई अध्ययन गर्न पठाएका थियौँ,” उनले भने, “प्राविधिकले पुल मर्मत हुने सम्भावना नरहेको जानकारी दिनुभएको छ, अब हामी त्यहाँ भएको जीर्ण पुल हटाएर बेलिब्रिज निर्माण गर्छौं ।” बेलिब्रिज निर्माणका लागि पालिकाले बजेट विनियोजन गरिसकेको जानकारी दिँदै अध्यक्ष स्याङ्बोले असोज महिनाभित्रै ठेक्का प्रक्रियामा जाने बताए।
