काठमाडौं। एनआईसी एशिया बैंकले आफ्नो संस्थागत सामाजिक उत्तरदायित्व अन्तर्गत कैलालीका तीन विद्यालय र मकवानपुरको मामाघर नेपाल संस्थालाई सहयोग गरेको छ। बैंकले शैक्षिक गुणस्तर सुधार र बालबालिकाको दैनिक जीवनमा सहजता पुर्याउने उद्देश्यले उक्त सहयोग प्रदान गरेको हो।
बैंकले कैलालीको सेती मैयाँ चौधरी माध्यमिक विद्यालयमा एक थान ल्यापटप, चार थान डेस्कटप कम्प्युटर र एक थान प्रिन्टर हस्तान्तरण गरेको छ। यस विद्यालयमा १९६ भन्दा धेरै विद्यार्थी अध्ययनरत छन्। त्यस्तै, ११७७ भन्दा धेरै विद्यार्थी रहेको वीरेन्द्र विद्यामन्दिर माध्यमिक विद्यालयलाई दुई थान ल्यापटप, पाँच थान डेस्कटप कम्प्युटर र एक थान प्रिन्टर उपलब्ध गराइएको छ। १०२ विद्यार्थी अध्ययनरत भानुभक्त राष्ट्रिय आधारभूत विद्यालयलाई एक थान ल्यापटप र एक थान प्रिन्टर हस्तान्तरण गरिएको बैंकले जनाएको छ।
यसैगरी, मकवानपुरस्थित मामाघर नेपाल संस्थालाई बैंकले खाद्यान्न तथा सरसफाइ सामग्री सहयोग गरेको छ। उक्त संस्थाले बाबुआमा नभएका र सहारा आवश्यक पर्ने २४ भन्दा धेरै बालबालिकालाई आवास र भोजनको सुविधा प्रदान गर्दै आएको छ। बैंकको सहयोगले संस्थामा आश्रित बालबालिकाको बसाइ थप सहज हुने विश्वास गरिएको छ।
