काठमाडौं। भारी हिमपात र निरन्तर वर्षाका कारण मनास्लु हिमाल आरोहण गर्न गएका आरोहीहरू बीचबाटै फर्कन थालेका छन्। दुई सातादेखि मौसमले साथ नदिएपछि आरोहीहरूले आरोहण स्थगित गरेर घर फर्किन थालेको चुमनुब्री गाउँपालिका-१ सामागाउँका वडाध्यक्ष कर्मा छेवाङ लामाले जानकारी दिए।
मनास्लु क्षेत्रमा लगातारको वर्षासँगै पाँच फिटसम्म बाक्लो हिउँ जमेको छ। वडाध्यक्ष लामाका अनुसार, सरकारले ८ देखि १२ गतेसम्म सतर्क रहन सूचना जारी गरेपछि आरोहीहरू थप जोखिम मोल्न नचाहेर फर्किन थालेका हुन्। स्थानीय व्यवसायी प्रबल लामाका अनुसार सन् २०१४ यता यस्तो प्रतिकूल मौसम पहिलोपटक देखिएको हो। बेस क्याम्पमा तीन फिट र माथिल्लो क्याम्पहरूमा सातदेखि आठ फिटसम्म हिउँ जमेको छ।
होटल व्यवसायी मिङ्मार छिरिङ लामाका अनुसार हालसम्म करिब १० प्रतिशत आरोही फर्किसकेका छन्। मौसममा सुधार आए पनि यस याममा आरोहण सम्भव नहुने स्थानीयको भनाइ छ। आठ हजार १६३ मिटर उचाइ रहेको मनास्लु हिमाल आरोहणका लागि यस वर्ष करिब ५०० जनाले अनुमति लिएका थिए। गत वर्ष ४१ समूहका ४९३ जना आरोहीले अनुमति लिँदा नेपाल सरकारले २२ करोड ४८ लाख १४ हजार रुपैयाँ राजस्व संकलन गरेको थियो।
