काठमाडौं: अर्थ मन्त्रालयले रासायनिक मल खरिद गर्न १० अर्ब रुपियाँ बराबरको स्रोत सुनिश्चित गरेको छ। कृषि, वन तथा पर्यावरण मन्त्रालयको प्रस्तावमा अर्थ मन्त्रालयले उक्त रकम स्वीकृत गरेको हो।
स्रोत सहमति प्राप्त भएसँगै अब मल खरिदका लागि टेन्डर आह्वान गर्ने प्रक्रिया अघि बढेको छ। कृषि, वन तथा पर्यावरण मन्त्री गीता चौधरीले आगामी सिजनमा किसानलाई आवश्यक पर्ने मलको सहज आपूर्ति सुनिश्चित गर्न मन्त्रालयले तयारी थालेको बताउनुभयो। मन्त्री चौधरीले किसानले खेतीको मुख्य समयमा मलको अभाव भोग्न नपरोस् भन्ने उद्देश्यले खरिद प्रक्रिया र आपूर्ति व्यवस्थापनलाई प्राथमिकताका साथ अघि बढाउन निर्देशन दिनुभएको छ।
सरकारले चालु आर्थिक वर्ष २०८३/८४ का लागि रासायनिक मल खरिद गर्न ३२ अर्ब ४६ करोड १९ लाख रुपियाँ विनियोजन गरेको छ। चालु आर्थिक वर्षमा पाँच लाख ५० हजार मेट्रिक टन मल खरिद गर्ने सरकारी लक्ष्य रहेको छ। मन्त्रालयका अनुसार असोज १ गतेसम्म दुई लाख ४० हजार मेट्रिक टन मल खरिदका लागि टेन्डर आह्वान भइसकेको छ। यसअघि तीन साताअघि बसेको मन्त्रिपरिषद् बैठकले कृषि सामग्री कम्पनी लिमिटेडलाई हिउँदे सिजनका लागि २५ हजार मेट्रिक टन डिएपी मल ल्याउन स्वीकृति प्रदान गरेको थियो।
