पोखरा। फ्लाई दुबईको जहाजले पोखरा अन्तर्राष्ट्रिय विमानस्थलमा पहिलो पटक उडान भरेको छ। दुबई अन्तर्राष्ट्रिय विमानस्थलबाट उडेको उक्त जहाज बिहान ६ बजेर १९ मिनेटमा पोखरामा अवतरण गरेको हो। विमानमा १ सय २५ जना यात्रु सवार थिए। फ्लाई दुबईका अनुसार ती यात्रुहरू विभिन्न देशबाट दुबई हुँदै पोखरा आएका हुन्। जहाजलाई स्वागत गर्न विमानस्थल परिसरमा व्यवसायी र सर्वसाधारणको उपस्थिति रहेको थियो।
अवतरण गरेको एक घण्टापछि सोही जहाज पुनः दुबईका लागि उड्ने तालिका रहेको छ। पोखराबाट १ सय ५३ जना यात्रु दुबईतर्फ प्रस्थान गर्दैछन्, जसमा केही बिजनेस क्लासका यात्रुहरू पनि रहेका छन्। १६६ सिट क्षमता रहेको उक्त विमानमा १० वटा बिजनेस क्लास र १ सय ५६ वटा इकोनोमी क्लासका सिटहरू रहेका छन्।
पोखरा महानगरपालिकाका मेयर धनराज आचार्यले फ्लाई दुबईको यो उडानलाई पोखराका लागि महत्त्वपूर्ण कोशेढुंगाका रूपमा व्याख्या गरेका छन्। लामो समयको तयारीपछि फ्लाई दुबईले नियमित उडानको तालिका सार्वजनिक गरेको हो। पोखराका पर्यटन व्यवसायीहरूले यस नियमित उडानले स्थानीय पर्यटन क्षेत्रमा उल्लेख्य सुधार ल्याउने अपेक्षा व्यक्त गरेका छन्।
