काठमाडौं। नेपाल उद्योग वाणिज्य महासंघअन्तर्गतको यातायात तथा पारवहन समितिको उपसभापतिमा अटोमोबाइल व्यवसायी मेघराज पौडेल मनोनीत भएका छन्।
महासंघका कार्यकारिणी समिति सदस्य लिलेन्द्रप्रसाद प्रधानको सभापतित्वमा रहेको उक्त समितिमा पौडेललाई उपसभापतिको जिम्मेवारी दिइएको हो।
महासंघले पौडेलको व्यावसायिक अनुभव र सक्रियताले यातायात तथा पारवहन क्षेत्रका चुनौती समाधान गर्न र व्यापार सहजीकरणमा महत्त्वपूर्ण योगदान पुग्ने विश्वास व्यक्त गरेको छ।
पौडेल हाल नाडा अटोमोबाइल्स एसोसिएसन अफ नेपाल (नाडा) का सचिव र अल्फा अटोमोटिभ प्रालिका निर्देशक हुन्। नेपालमा रोयल इन्फिल्ड मोटरसाइकलको बजार विस्तारमा लामो समयदेखि सक्रिय रहेका उनीसँग अटोमोबाइल क्षेत्रको प्रत्यक्ष व्यावसायिक अनुभव छ।
पौडेलले नाडामार्फत कर तथा राजस्व नीति, एसेम्बली उद्योग प्रवर्द्धन र व्यवसायमैत्री वातावरण निर्माणका लागि सरकारी निकायहरूसँग पैरवी गर्दै आएका छन्।
अटोमोबाइल उद्योगलाई दीर्घकालीन रूपमा अघि बढाउन उनले अन्तर्राष्ट्रिय मापदण्डका स्थानीय उत्पादन र उद्योगमैत्री नीतिको पक्षमा वकालत गर्दै आएका छन्।
अब उनको भूमिका अटोमोबाइल क्षेत्रमा मात्र सीमित नरही समग्र यातायात, पारवहन र आपूर्ति शृंखलाको नीतिगत सुधारमा केन्द्रित हुने महासंघले जनाएको छ।
