काठमाडौं: कृषि सामग्री कम्पनी लिमिटेड (केएससीएल) ले ३० हजार मेट्रिक टन युरिया मल खरिद गर्न अन्तर्राष्ट्रिय बोलपत्र आह्वान गरेको छ। कम्पनीले बिहीबार एक सूचना जारी गर्दै युरिया ४६-०-० मल खरिदका लागि प्रतिस्पर्धात्मक बोलपत्र खुलाएको हो। यस प्रक्रियामा विश्वभरका योग्य आपूर्तिकर्ताहरूले सहभागिता जनाउन सक्नेछन्।
बोलपत्रका सर्तअनुसार आपूर्तिकर्ताले मल कोलकाता वा हल्दिया बन्दरगाह हुँदै नेपालका विराटनगर, वीरगन्ज र भैरहवास्थित कम्पनीका गोदामसम्म ढुवानी गर्नुपर्नेछ। डीडीपी नेपाल आधारमा गरिने उक्त आपूर्तिमा अन्तिम गन्तव्यसम्मको बिमासमेत आपूर्तिकर्ताले नै व्यवस्था गर्नुपर्नेछ।
कम्पनीले बोलपत्र खरिदका लागि ४ लाख रुपैयाँ शुल्क तोकेको छ भने बोलपत्र जमानतका रूपमा २० हजार अमेरिकी डलर बुझाउनुपर्नेछ। यस प्रक्रियामा सहभागी हुन चाहनेका लागि अक्टोबर १६, २०२६ मा दिउँसो २ बजे कुलेश्वरस्थित प्रधान कार्यालयमा पूर्वबोलपत्र बैठक राखिएको छ।
इच्छुक र योग्य बोलपत्रदाताहरूले अक्टोबर २६, २०२६ को दिउँसो १ बजेसम्म प्रधान कार्यालयमा बोलपत्र पेस गर्नुपर्नेछ। सोही दिन दिउँसो २ बजे बोलपत्र खोलिने कम्पनीले जनाएको छ। बोलपत्र पेस गर्दा प्रचलित सार्वजनिक खरिद ऐन तथा नियमावलीबमोजिम प्राविधिक र वित्तीय प्रस्तावहरू छुट्टाछुट्टै सिलबन्दी गरी पेस गर्नुपर्नेछ। थप जानकारीका लागि कम्पनीको वेबसाइट वा प्रधान कार्यालयमा सम्पर्क गर्न सकिनेछ।
