धादिङ । अविरल वर्षाका कारण पृथ्वी राजमार्गअन्तर्गत धादिङका विभिन्न सात स्थानमा पहिरो खस्दा यातायात प्रभावित भएको छ। पहिरोका कारण दुई स्थानमा राजमार्ग पूर्ण रूपमा अवरुद्ध भएको छ भने अन्य स्थानमा एकतर्फी यातायात सञ्चालन भइरहेको छ।

जिल्ला प्रहरी कार्यालय धादिङका सूचना अधिकारी एवं डीएसपी प्रकाश दाहालका अनुसार कृष्णभिर, परेवाभिर, ज्यामिरेघाट, जहरे, जवाङखोला, तिगराङ खोला र कमेरेभिरमा पहिरो खसेको हो।

उनका अनुसार कृष्णभिर र तिगराङ खोलामा पहिरोका कारण सडक दुवैतर्फबाट पूर्ण रूपमा अवरुद्ध भएको छ। अन्य पाँच स्थानमा भने एकतर्फी रूपमा सवारीसाधन सञ्चालन भइरहेका छन्।

कृष्णभिरमा दुईवटा उपकरण प्रयोग गरी पहिरो पन्छाउने काम भइरहेको प्रहरीले जनाएको छ। तर लगातार वर्षा भइरहनुका साथै पहिरो खस्ने क्रम नरोकिएकाले राजमार्गलाई पूर्ण रूपमा सञ्चालनमा ल्याउन कठिनाइ भइरहेको डीएसपी दाहालले बताए।

पहिरोका कारण पृथ्वी राजमार्ग हुँदै आवतजावत गर्ने सवारीसाधन प्रभावित भएका छन्। प्रहरीले राजमार्गको अवस्था बुझेर मात्र यात्रा गर्न र पहिरो तथा जोखिमयुक्त क्षेत्रमा विशेष सावधानी अपनाउन आग्रह गरेको छ।