काठमाडौं: अविरल वर्षापछिको बाढी र पहिरोले कालीगण्डकी करिडोर अवरुद्ध हुँदा नेपाल-चीनबीचको स्थलगत व्यापार ठप्प भएको छ। सडक विभागका अनुसार करिडोरका विभिन्न खण्डमा पहिरो, डुबान, पुल र कल्भर्टमा क्षति पुगेपछि यातायात सेवा प्रभावित भएको हो।
रसुवागढी-केरुङ नाका यसअघि नै बन्द रहेको र तातोपानी नाका चिनियाँ पक्षबाट अनिश्चितकालका लागि बन्द भएपछि नेपाल-चीन व्यापार कोरला नाकाबाट हुँदै आएको थियो। तर, पछिल्लो समय कालीगण्डकी करिडोरमा आएको बाढी र पहिरोले उक्त मार्ग पनि अवरुद्ध बनेको छ।
कालीगण्डकी करिडोर योजनाका प्रमुख तेजश्वी शर्माका अनुसार म्याग्दी र मुस्ताङका विभिन्न खण्डमा पहिरो र डुबानका कारण सडक अवरुद्ध छ। केराबारी, फर्से, लामाखेत, मिलन चोक, बेनी-गलेश्वर, रघुगंगा, घाँसा, जोमसोम र कागबेनीलगायतका क्षेत्रमा पहिरो र बाढीले क्षति पुर्याएको छ। शर्माले मुस्ताङ खण्ड सोमबार साँझसम्म खुलाउने योजना रहेको र म्याग्दी खण्डमा पुलको एप्रोच रोड बगाएकाले सञ्चालनमा केही समय लाग्ने जानकारी दिए।
नेपाल हिमालय सीमापार वाणिज्य संघका अध्यक्ष रामहरि कार्कीले भौगोलिक कठिनाइका कारण कोरला नाका व्यापारिक दृष्टिकोणले चुनौतीपूर्ण रहेको बताए। उनले भने, ‘अहिले पानी पर्दा कोरलामा गाडीहरु हिउँमा आधा फसेका छन्।’ उनले रसुवागढी र कोरला नाका अवरुद्ध भएको अवस्थामा तातोपानी नाका सञ्चालनका लागि कूटनीतिक पहल गर्नुपर्नेमा जोड दिए।
भन्सार विभागको तथ्यांक अनुसार चालू आर्थिक वर्ष २०८३/८४ को भदौ मसान्तसम्म मुस्ताङको कोरला नाकाबाट ८ अर्ब ३३ करोड ५५ लाख ९८ हजार रुपैयाँबराबरको व्यापार भएको थियो। जसमा ८ अर्ब ३३ करोड २१ लाख ५१ हजार रुपैयाँको आयात र ३४ लाख ४७ हजार रुपैयाँको निर्यात भएको छ।
