काठमाडौं। साताको पहिलो कारोबार दिन सोमबार शेयरबजार परिसूचक नेप्सेमा १६ अंकभन्दा बढीको गिरावट आएको छ। नेपाल स्टक एक्सचेन्जका अनुसार नेप्से सूचक १६.४७ अंकले घटेर २ हजार ६१३.३३ अंकमा सीमित भएको छ।
बजारमा गिरावट आए पनि कारोबार रकममा भने उत्साह देखिएको छ। यस दिन ५ अर्ब ३८ करोड ५७ लाख ८५ हजार रुपैयाँ बराबरको १ करोड ३१ लाख ७८ हजार कित्ता शेयर खरिद-बिक्री भएको छ।
कारोबारमा आएका समूहगत उपसूचकहरूमध्ये ट्रेडिङ समूहको उपसूचक ०.२३ प्रतिशतले सामान्य बढेको छ भने बाँकी १२ वटा उपसूचक ऋणात्मक रहेका छन्। बजारमा कुल २२३ कम्पनीको शेयरमूल्य घट्दा ५० कम्पनीको मात्र मूल्य बढेको छ।
यस दिन लक्ष्मीसनराइज डिभेन्चरको मूल्य १५ प्रतिशत र केबीएल डिभेन्चरको मूल्य १२.१७ प्रतिशतले बढेको नेपाल स्टक एक्सचेन्जले जनाएको छ।
